Журналістку абвінавацілі ва ўдзеле ў акцыі

Пазаштатнага карэспандэнта недзяржаўнай газеты “Брестский курьер” Настассю Мялешку, якая па заданні рэдакцыі прысутнічала 19 жніўня на прэзентацыі кнігі П. Севярынца “Лісты з лесу”, суд Маскоўскага раёна Брэста прызнаў вінаватай ва ўдзеле ў несанкцыянаваным сходзе.

26 верасня суддзя Вольга Смірнова, кіруючыся арт. 23.34 ч.1 КаАП (парушэнне вызначанага парадку правядзення масавых мерапрыемстваў), вынесла журналістцы папярэджанне.

Аргументы Настассі Мялешкі пра тое, што ўдзельнічала яна ў прэзентацыі па рэдакцыйным заданні, а таксама прадстаўленыя як пацверджанне гэтага газетныя публікацыі суддзя Смірнова не прыняла да ўвагі. Яна заявіла, што, калі журналістка не працуе ў штаце выдання, то не лічыцца супрацоўнікам газеты.

Нагадаем, 4 верасня аналагічнае папярэджанне суддзя Смірнова вынесла сябру БАЖ Любові Праневіч.

Між тым, арт. 39 Закона “Аб друку і іншых сродках масавай інфармацыі” гарантуе журналісту права прысутнічаць на месцы грамадска важных падзей і перадаваць адтуль інфармацыю.