На Камароўцы ў Менску чэргі і пустыя прылаўкі

Камароўскі рынак у Менску звычайна бойкае месца. Але ў пятніцу гандлёвыя месцы былі не такімі ажыўленымі. Зіхацелі пустыя прылаўкі, дзе працавалі адна-дзве кропкі. Ранейшая атмасфера толькі ў мясных радах. Малочныя, хлебныя і агароднінныя рады запоўненыя ледзь як напалову, піша «КП в Беларуси».

– Зноў вяртаемся ў эпоху чэрг, – ківае ахоўнік на працяглы хвост, які выцягнуўся за малаком. – Людзі лічаць, што раз чагосьці ў краме няма, на рынку знойдзецца. А тут частка кропак не працуе.

Цэны, у параўнанні з пераднавагоднімі, падняліся ў сярэднім на дзве тысячы. Свініну часцей за ўсё прапаноўваюць па 17 200 руб. за кг шыі або шынкі, сыры (Расейскі, Манастырскі) – па 12 – 14 тыс. руб. за кг, а памяранцы, мандарыны і хурму – ад чатырох тыс. руб. за кг.

– З прычыны страйку прадпрымальнікаў цэны растуць?

– Цэны залежаць ад таго, па якім кошце нам прадаюць тавар пастаўшчыкі, – тлумачыць прадавец. – А мы цэны паднімаць не збіраемся.