Расейскія СМІ напісалі пра цяжкую хваробу Пуціна

Агенцтва расейскай інфармацыі, якое належыць да "Нацыяналістычнай апазіцыі" (паводле класіфікацыі каталога ЕЖЕ.ру), апублікавала артыкул пастаяннага аўтара гэтага рэсурсу Пятра Хамякова пра цяжкую хваробу прэзідэнта РФ Уладзіміра Пуціна, паведамляе NEWSru.com.

У артыкуле сцвярджаецца, што апошнім часам Пуцін дрэнна выглядае, што, магчыма, ён праходзіць працэдуры па "ачыстцы крыві", пасля якіх выглядае лепш і маладзей.

У якасці доваду аўтар прыводзіць розніцу паміж "свежым" знешнім выглядам прэзідэнта падчас выбараў і тым, як ён дрэнна выглядаў падчас навагодняга звароту. У якасці экспертнага меркавання аўтар прыводзіць ацэнкі лекараў, якія бачылі выступ Пуціна.

"Нават абывацелі зазначылі, што Пуцін, чытаючы свой навагодні зварот да народа, выглядаў вельмі абыякава. Нездаровы колер і фактура скуры, сівізна, якая раптам з’явілася. І гэта прытым, што першую асобу пры падрыхтоўцы яго выступу інтэнсіўна падрыхтоўвае да здымкі цэлая каманда касметолагаў. Але нават яны не змаглі схаваць відавочна нездаровы выгляд кліента", – піша аўтар.

Усё гэта, на думку аўтара, паказвае на тое, што ў Пуціна "сапраўды вельмі дрэнна са здароўем". Гемасарбцыя, з дапамогай якой яго рэзка "амаладзілі" перад 2 снежня, не магла быць паўтораная перад Новым годам, бо гэтую працэдуру нельга рабіць занадта часта.