Менскія ўлады забаранілі продаж спіртнога ў горадзе

16 кастрычніка ў сталіцы праходзіць фінальны этап акцыі ГУУС Менгарвыканкама «Менск — тэрыторыя цвярозасці», якая праводзілася ў горадзе на працягу апошніх 10 дзён.

У межах акцыі ў крамах горада з 14.00 будзе забароненая рэалізацыя ўсіх спіртных напояў, у тым ліку піва.

Аб гэтым БелаПАН паведаміў кіраўнік аддзялення інфармацыі і грамадскіх сувязяў ГУУС Менгарвыканкама Аляксандр Ластоўскі.

Супрацоўнікі міліцыі з зацікаўленых ведамстваў наведаюць сем'і ў дрэнным становішчы, азнаёмяцца са становішчам па месцы пражывання бытавых скандалістаў. Адмысловая ўвага будзе надавацца ўмовам пражывання дзяцей у такіх сем'ях.

16 кастрычніка ў Менску будзе курсіраваць "трамвай цвярозасці": звычайны маршрутны трамвай падчас чарговага рэйса "акупіруюць" супрацоўнікі міліцыі і прапануюць пасажырам далучыцца да ініцыятывы правесці гэты дзень без спіртнога. Суправаджаць трамвай будзе патрульны аўтамабіль ДАІ.

У памяшканні Завадскога РУУС адбудзецца выязны суд па асуджэнні ў ЛТП. На тэрыторыі сярэдняй школы № 210 інспектары па справах непаўнагадовых правядуць акцыю пад назвай "Забі" на шкодныя звычкі". Падчас перформансу школьнікам будзе прапанавана ўвагнаць цвік у бервяно-«цыгарэту».

Ва ўсіх раёнах сталіцы будуць працаваць перасоўныя наркалагічныя пункты, прызначанае ўзмацненне нарадаў ДПС на некаторых праспектах і вуліцах.