Кандыдат у прэзідэнты ЗША Джон Макейн «загаварыў» па-беларуску
4- 22.10.2008, 11:51
Да выбараў прэзідэнта ЗША крыху менш за два тыдні. Цяперашнюю перадвыбарную гонку ўжо назвалі наватарскай: выбаршчыкі вялі дзённікі аб выбарах, кандыдаты выкладвалі свае відэа на сэрвіс ютуб, а Джон Макейн дабраўся нават да беларускамоўных наведвальнікаў глабальнай сеткі!
Рэсурс mccainforbelarus.com
І сапраўды, сенатар Макейн неабыякавы да нашай краіны.
- Я планаваў прыехаць у Беларусь у якасці кіраўніка дэлегацыі сенатараў ЗША. Мы спадзяваліся правесці некалькі сустрэч, уключаючы сустрэчу з прэзідэнтам. Аднак нам адмовілі ў выдачы віз, - казаў Маккейн у 2004 годзе.
Сёлета, у сярэдзіне ліпеня, за рэзкую крытыку ў свой адрас Макейн выказаўся аб дарадчыку па эканамічных пытаннях Філе Грэмме.
- Я сур'езна разгледжу ягоную кандыдатуру на пасаду амбасадара ў Беларусь. Праўда, не ўпэўнены, што жыхарам Менска гэта спадабаецца, - сказаў Маккейн. Неўзабаве пасля гэтай заявы дарадчык падаў у адстаўку і сышоў з выбарчага штаба сенатара.
Заўвага www.charter97.org: Варта дадаць, што Джон Макейн заўсёды адзначаў, што Беларусь – апошняя дыктатура Еўропы, а Аляксандра Лукашэнку нават назваў «брутальным дыктатарам».
«Лукашэнка – брутальны дыктатар. Я лічу, што Амерыка павінная супрацстаяць дыктатарам. Я падтрымліваю санкцыі супраць яго ўлады», - заявіў кандыдат у прэзідэнты ЗША ад Рэспубліканскай партыі Джон Макейн у ліпені гэтага года.
