Старшынём новай «палаты» стаў Уладзімір Андрэйчанка

Старшынём «палаты прадстаўнікоў» чацвёртага склікання стаў Уладзімір Андрэйчанка, які займаў пасаду старшыні Віцебскага аблвыканкама.

Як перадае "Інтэрфакс", за кандыдатуру Андрэйчанкі на пасаду спікера прагаласавалі 107 “дэпутатаў”, супраць - 1, адзін бюлетэнь быў прызнаны несапраўдным.

Андрэйчанка нарадзіўся ў 1949 годзе ў вёсцы Мар’янава Ліозненскага раёна Віцебскай вобласці. У 1968 годзе скончыў Лужэснянскі сельскагаспадарчы тэхнікум, у 1977 годзе - Вялікалуцкі сельскагаспадарчы інстытут (Расея), у 1988 годзе - Менскую вышэйшую партыйную школу. Заслужаны працаўнік сельскай гаспадаркі Беларусі. Пасля службы ў шэрагах Узброеных сіл з 1970 года быў на камсамольскай, партыйнай, гаспадарчай працы ў Ліозненскім раёне. У 1981-1991 гадах - начальнік упраўлення сельскай гаспадаркі, старшыня Ліозненскага райвыканкама, першы сакратар Верхнядзвінскага райкама КПБ. У 1991-1994 гадах - першы намеснік старшыні, старшыня камітэта па сельскай гаспадарцы і забеспячэнні насельніцтва харчаваннем Віцебскага аблвыканкама. Сябра Савета рэспублікі Нацыянальнага схода Беларусі (1996, 2000, 2004 гадах).

Працаваў старшынём Віцебскага аблвыканкама з лістапада 1994 года.

Нагадаем, што міжнародная супольнасць прызнала «парламенцкія выбары», якія прайшлі ў Беларусі, несвабоднымі і недэмакратычнымі. Апазіцыя таксама не прызнае вынікаў галасавання і лічыць іх сфальсіфікаванымі.