Міністр эканомікі не зможа выканаць уласны план інфляцыі

Міністр эканомікі Беларусі Мікалай Зайчанка агучыў журналістам прагноз інфляцыі на верасень, але затым прызнаў, што «у зададзеныя параметры мы не ўпішамся».

«Мы мяркуем, што інфляцыя складзе 1–1,2%. Аднак канчатковыя дадзеныя будуць вядомыя праз 3 дні», – сказаў міністр учора падчас сустрэчы з журналістамі.

Крыху ў тупік міністра паставіла пытанне аб прагнозе не на мінулае, а на будучыню, гэта значыць аб узроўні інфляцыі па выніках года. Мікалай Зайчанка спачатку прызнаў, што «мы не ўпішамся ў зададзеныя параметры», а потым, як быццам апраўдваючыся, заўважыў, што «прагнозы – справа няўдзячная».

«Паглядзіце, якое сонца, а хто б мог з раніцы дапусціць, што будзе такое надвор'е», – сказаў Мікалай Зайчанка.

Вось зараз метэаролагі, якіх заўсёды лаюць, пачнуць абурацца. Як так, эканамісты могуць рабіць прагнозы аб тым, што ўжо адбылося, а метэаролагі - не? Напэўна і апошнія таксама захочуць рабіць прагноз надвор'я на ўчора, робіць выснову «Ежедневник».