Перамовы беларускага рэжыму з МВФ ідуць «няпроста»
10- 17.11.2008, 13:35
Віцэ-прэм'ер Андрэй Кабякоў заявіў, што перамовы Беларусі і МВФ аб даванні крэдыту ў памеры 2 мільярдаў даляраў праходзяць няпроста.
«Мы вядзем актыўныя перамовы з МВФ. Перамовы няпростыя», - заўважыў Андрэй Кабякоў.
Пры гэтым ён падкрэсліў, што «грошы на любых умовах мы браць не будзем, а возьмем пад стабілізацыю пэўных працэсаў у эканоміцы», паведамляе «Интерфакс».
Віцэ-прэм'ер лічыць, што МВФ неабходна змяніць шаблонны падыход пры выдачы крэдытаў.
«Раней па крэдыты звярталіся асобныя краіны, якія адчувалі крызісныя з'явы. Цяпер крызіс ва ўсім свеце, і ўмовы трэба пераглядаць», - сказаў Андрэй Кабякоў.
Нагадаем, раней у інтэрв'ю прэс-цэнтру Хартыі’97 экс-кіраўнік Нацбанка Станіслаў Багданкевіч патлумачыў, чаму ўрад Беларусі ўжо тры тыдні беспаспяхова вядзе перамовы з Міжнародным валютным фондам аб вылучэнні крэдыту.
«Улады пакуль што не дамовіліся з МВФ, паколькі ён не выдае крэдыт «за прыгожыя вочкі». Неабходна падаць праграму па скарачэнні дэфіцыту гандлёвага балансу, скарачэнні інфляцыі. І ён не выдае ўвесь крэдыт адразу, а па частках: спачатку 200 тысячаў даляраў, потым, пры ўмове выканання праграмы пераўтварэнняў - яшчэ 200 тысячаў, і гэтак далей», - сказаў Станіслаў Багданкевіч.
