Заўзятары «Зеніта» правялі ноч у менскім выцвярэзніку

Супрацоўнікі міліцыі даставілі мінулай ноччу ў менскі медыцынскі выцвярэзнік дваіх заўзятараў футбольнага клуба «Зеніт».

Аб гэтым паведамілі агенцтву "Інтэрфакс-Захад" у выцвярэзніку.

"Двое заўзятараў "Зеніта", якія знаходзіліся ў моцнай ступені ап'янення, мінулай ноччу былі дастаўленыя ў выцвярэзнік. Іх знайшлі на адной з вуліц у Партызанскім раёне Менска", паведамілі суразмоўцы агенцтва.

Па іх словах, "п'яныя заўзятары адаспаліся, заплацілі штраф і пакінулі выцвярэзнік. Сёння раніцай перад сыходам іх напаілі гарачай гарбатай".

Акрамя гэтага, мінулай ноччу ў выцвярэзнік было дастаўлена 8 беларускіх заўзятараў, яны таксама заплацілі штраф.

Як паведамілі агенцтву ў МУС Беларусі, парушэнняў падчас і пасля матчу БАТЭ-Зеніт дапушчана не было. "Частка піцерскіх заўзятараў з'ехала на цягніку ўначы адразу пасля матчу, частка заўзятараў яшчэ ў Менску і сёння яны павінныя адправіцца дадому", адзначылі суразмоўцы агенцтва.