Даляры беларусы зараз скупляюць моўчкі

Як беларусы рэагуюць на заяву Нацыянальнага банка аб гатовасці прыцягваць да адказнасці за інфармацыю аб магчымым краху эканомікі?

Нагадаем, што на днях чыноўнікі Нацбанка заявілі, што ў апошні час з'явіліся людзі, якія прадстаўляюцца сваякамі і сябрамі кіраўнікоў органаў дзяржкіравання і сеюць паніку ў касавых залах. Такіх панікёраў парэкамендавалі выяўляць з дапамогай МУС і прыцягваць да крымінальнай адказнасці.

- Гаворка ідзе аб людзях, якія заходзяць у банк і пачынаюць запалохваць кліентаў. Яны могуць проста падыйсці да любога чалавека і пачаць распаўсюджваць чуткі ў чарзе. Калі гэта мэтанакіравана, ім пагражае артыкул 250 КК РБ «Аб распаўсюджванні ілжывай інфармацыі аб таварах і паслугах», - растлумачыў газеце «Комсомольская правда в Беларуси» начальнік упраўлення інфармацыі Нацбанка Анатоль Драздоў.

Па гэтым артыкуле паложаны штраф, або выпраўленчыя працы да двух год, або арышт на тры месяцы, або абмежаванне волі на два гады.

- А калі проста размаўляць у чарзе аб сусветным фінансавым крызісе, могуць папрасіць прайсці ў аддзяленне міліцыі? - удакладніла газета ў Нацбанку.

- Вядома, усё можа быць. А міліцыя ўжо высвятліць, ці мэтанакіравана вы распаўсюджвалі чуткі, -- адказалі там.

Журналісты накіраваліся ў банкі, каб праверыць, ці палохаюць адзін аднаго беларусы фінансавым крызісам. У канцы працоўнага дня жадаючых паспець абмяняць грошы было шмат. Усе маўчалі. Некаторыя пералічвалі з калькулятарам рублі. Толькі адзін з мінакоў заўважыў побач з таблічкай з курсамі:

- О-о! Ізноў курс паднялі….

У абменным пункце на вакзале чарга была даўжэйшая, а людзі такія ж негаманлівыя. Толькі парачка шапталася аб асабістых справах. Трое маладых людзей загаварылі напаўголасу:

- Захацелася схадзіць у цырк.

- Навошта?

- Так, вясёлага ў жыцці мала. Фінансавы крызіс…

- Цішэй, ціш-ш-шэй, - зашыпела дзяўчына. - Не чулі пра навіну? Зараз вас арыштуюць!

Усе засмяяліся. Яшчэ б: вакол не было ні воднага міліцыянта.