Міністры замежных справаў краінаў ЕЗ зацвердзілі палітыку Усходняга партнёрства
2- 9.12.2008, 13:30
Міністры замежных справаў краінаў Еўразвяза зацвердзілі прапанаваную Еўракамісіяй палітыку Усходняга партнёрства.
Як паведамляе прэс-служба Еўракамісіі са спасылкай на еўракамісара па знешніх сувязях і палітыцы суседства Беніту Ферэра-Вальднер, 8 снежня міністры падрыхтавалі адпаведнае камюніке, якое будзе пададзена для зацвярджэння кіраўнікоў дзяржаваў і ўрадаў краінаў ЕЗ на Еўрапейскім саміце ў Брусэлі 11—12 снежня.
Як БелаПАН паведамляў раней, удзел у палітыцы Усходняга партнёрства Еўракамісія прапаноўвае шасці постсавецкім краінам — Арменіі, Азербайджану, Беларусі, Грузіі, Малдове, Украіне. Ім, у прыватнасці, прапанаванае пагадненне аб асацыяцыі і стварэнні новай еўрапейскай эканамічнай зоны, якая павінна стаць базай для развіцця агульнага ўнутранага рынка.
Мэта палітыкі Усходняга партнёрства — істотна пашырыць пакет магчымых прапановаў шасці постсавецкім краінам. У якасці перспектыў разглядаецца адмена візавага рэжыму і стварэнне зоны свабоднага гандлю.
Паўнавартасны ўдзел Беларусі пакуль пад пытаннем. Рашэнне аб гэтым будзе прымацца ўвесну ў залежнасці ад дэмакратычнага прагрэсу краіны.
Афіцыйныя прадстаўнікі Беларусі неаднаразова станоўча выказваліся з нагоды новай палітыкі Еўразвяза.
