Міклашэвіч: «Мы не маем права проста назіраць за тым, як парушаецца Канстытуцыя»

Старшыня Канстытуцыйнага суду Беларусі Пётр Міклашэвіч лічыць неабходным надзяліць суд правам ініцыяваць перад прэзідэнтам краіны пытанне аб адхіленні ад пасад службоўцаў за парушэнне імі норм Канстытуцыі.

"Так, такія думкі ў нас ёсць. Мы хочам, каб КС не проста канстатаваў парушэнне нормаў Канстытуцыі. Калі вызначанае, што пэўная асоба не выконвае нормы Канстытуцыі, то мы павінны ставіць перад прэзідэнтам і іншымі дзяржорганамі пытанне аб адхіленні іх ад занятых пасад", – заявіў П.Міклашэвіч, адказваючы на прэс-канферэнцыі на пытанне "Інтэрфакса".

"Мы не маем права проста назіраць за тым, як парушаецца Канстытуцыя", – падкрэсліў кіраўнік КС.

Тым не менш, Міклашэвіч паведаміў, што Канстытуцыйны суд не лічыць неабходным здзяйсняць канстытуцыйны кантроль за ходам парламенцкіх і прэзідэнцкіх выбараў у краіне.

"Я не бачу неабходнасці браць Канстытуцыйнаму суду дадатковыя паўнамоцтвы па ажыццяўленні кантролю за правядзеннем выбараў", – адзначыў кіраўнік КС.

Пры гэтым ён паведаміў, што "ў шэрагу краін у канстытуцыйных судоў такія паўнамоцтвы ёсць". "У нас такі кантроль здзяйсняе сістэма агульных судоў. І як паказала практыка, такая сістэма працуе эфектыўна", – заявіў П.Міклашэвіч.