Дачка Казуліна патрабуе для бацькі змены пакарання
- 13.03.2008, 13:58
Малодшая дачка Аляксандра Казуліна Юлія другі раз накіравала начальніку калоніі “Віцьба-3” Віталю Агнісцікаву ліст, у якім просіць змяніць для бацькі пакаранне.
Пра гэта «Радыё Рацыія» распавёў былы адвакат палітзняволенага Ігар Рынкевіч.
Першы такі ліст Юлія Казуліна накіравала ў калонію яшчэ ў студзені. Але тады, як адзначыў Ігар Рынкевіч, адміністрацыя “Віцьбы-3” адмовілась замяніць Казуліну зняволенне на больш мяккую форму адбыцця пакарання па фармальных прычынах.
- У тым лісце сваякі прасілі пра ўмоўна-датэрміновае вызваленне. Але, згодна з Крымінальна-працэсуальным кодэксам, на гэта можна разлічваць толькі пасля адбыцця паловы тэрміна пакарання. Казулін адседзеў толькі траціну. Таму яму можна пакуль толькі замяніць знаходжанне ў калоніі на іншыя формы адбыцця пакарання, прыкладам, на абмежаванне волі.
Пры гэтым ён падкрэсліў, што ў лісце гаворка не ідзе пра просьбу аб памілаванні палітвязня.
- Гэта зусім іншая працэдура. Але, насамрэч, нішто не замінае Лукашэнку і без усялякіх зваротаў скарыстацца сваім канстытуцыйным правам амніставаць Аляксандра Казуліна.