«Дэпутат» Здановіч: «Шкада, што ў нас нельга адпраўляць на лесапавал»

У беларускім «парламенце» задумваюцца над тым, што дзяржава павінна прымусіць бацькоў, дзеці якіх засталіся без сямейнай апекі, працаваць і кампенсаваць узніклыя з іх віны дзяржаўныя выдаткі.

«У нас дастаткова сілавых структур для таго, каб прымусіць нядбайных бацькоў працаваць і кампенсаваць дзяржаве выдаткі на ўтрыманне іх дзяцей. Але іх трэба не запрашаць на працу, а вывозіць на так званае вольнае селішча і прымушаць працаваць», – заявіў «Інтэрфаксу» намеснік старшыні камісіі па ахове здароўя, фізічнай культуры, справам сям'і і моладзі «палаты прадстаўнікоў» «нацыянальнага сходу» Мікалай Дубавік.

«Дэпутат» звярнуў увагу на тое, што «калі чалавек не вяртае крэдыт банку, то яго адразу ж ставяць на месца, таму, хто не аплачвае камунальныя плацяжы, адключаюць газ і электраэнергію». «Так дзяржава павінна больш цвёрда разбірацца і з бацькамі-неплацельшчыкамі. Не трэба іх пазбаўляць свабоды, трэба прымушаць працаваць. Але не такім шляхам, які выпрацавала наша МУС, калі просяць і запрашаюць на працу гэтага так званага бацьку», – сказаў ён.

На яго думку, такіх бацькоў можна было б прымусіць займацца, у прыватнасці, добраўпарадкаваннем былых вайскоўцаў мястэчкаў. «Іх таксама варта б сабраць і вывезці ў сельскую мясцовасць на працы. Бо ў нас столькі працоўнай сілы бракуе ў сельскай гаспадарцы – палоць бурак, займацца ўборкай», – сказаў намеснік камісіі.

Кіраўнік камісіі па адукацыі, культуры, навуцы і навукова-тэхнічнаму прагрэсу ніжняй палаты парламента Уладзімір Здановіч таксама лічыць, што «ў любым выпадку карныя меры павінны быць». «Калі людзі адмаўляюцца працаваць і пакрываць выдаткі дзяржаве на ўтрыманне сваіх дзяцей, то такіх трэба жорстка караць. Натуральна, прыцягваць да крымінальнай адказнасці», – сказаў кіраўнік камісіі. «Шкада, што ў нас не такая вялікая краіна, як, напрыклад, Расея, дзе можна было б такіх адпраўляць на лесапавал», – дадаў ён. «Канцлагеры для іх, вядома, ствараць не трэба, гэта дурасць. Але элементарна ў калгасах бракуе працоўных рэсурсаў, праца там заўсёды будзе», – сказаў дэпутат.

У 2007 і першыя месяцы гэтага года беларускімі судамі было вынесенае больш як 18 тысяч азначэнняў, якія абавязваюць бацькоў пакрываць выдаткі на ўтрыманне сваіх дзяцей, аднак толькі 10 тысяч чалавек з такіх бацькоў былі працаўладкаваныя, а больш як 7 тысяч не з'явіліся да месца працы.

Павелічэнне колькасці пазбаўленых бацькоўскіх правоў кіраўнік дэпутацкай камісіі У.Здановіч назваў «даволі прыкрай» сітуацыяй. «Нават пасля вайны сірот было менш, іх разбіралі людзі ў сем'і. А ў рэспубліцы дзеецца самае сапраўднае бязладдзе з прычыны нядбайных бацькоў, якія п’юць», – сказаў «парламентарый».

Пры гэтым ён падкрэсліў, што «нараўне з узмацненнем адказнасці трэба змяняць прытомнасць людзей».

Аляксандр Лукашэнка заявіў пра неабходнасць дэталізаваць парадак прыцягнення да адказнасці і працаўладкавання нядбайных бацькоў і спагнання з іх запазычанасцяў па плацяжах. Ён таксама лічыць неабходным забяспечыць пастаяннае ўзаемадзеянне судоў, органаў унутраных спраў, адукацыі, дзяржаўнай службы занятасці. «Ніхто не павінен застацца ўбаку ад гэтага працэсу. Гэта вялікае палітычнае пытанне», – сказаў ён.