42 жанчыны спрабуюць прарвацца ў адміністрацыю прэзідэнта

Сорак дзве беларускія жанчыны звярнуліся 5 сакавіка з адкрытым лістом да Аляксандра Лукашэнкі, у якім просяць сустрэцца з імі. Сярод аўтараў звароту – сваякі асуджаных; нязгодныя з рашэннямі судоў па сваіх грамадзянскіх справах; тыя, хто пацярпеў ад адмыслова цяжкіх злачынстваў, піша БелаПАН.

Жанчыны адзначаюць, што ў снежні 2007 года ўжо звярталіся да Лукашэнкі з прапановай стварыць, па прыкладзе Вялікабрытаніі, спецыяльную парламенцкую камісію па пераглядзе крымінальных і грамадзянскіх спраў.

"Бо на гэты зварот не быў атрыманы адказ, у студзені 2008 года мы чарговым разам звярнуліся да Вас з просьбай аб асабістым прыёме, але зноў атрымалі адмоўны адказ, – гаворыцца ў лісце. – Каб прыцягнуць Вашу ўвагу да нашых праблем і ўсё-ткі вырашыць пытанне аб сустрэчы з Вамі, мы нават звярнуліся да прэзідэнта Расеі Уладзіміра Пуціна. Аднак і гэты зварот "патануў" у нетрах Вашай адміністрацыі. Вось чаму чарговым разам да Вас звяртаюцца тыя, хто гадамі не можа атрымаць адказ на свае скаргі ў органы суду і пракуратуры, як гэта прадугледжанае артыкулам 40 Канстытуцыі Рэспублікі Беларусь. Ад гэтых адказаў залежыць наш лёс і лёс нашых блізкіх. Аднак на свае скаргі замест адказаў мы атрымліваем адпіскі ад службоўцаў, якія тым самым дэманструюць не толькі абыякавасць і пагардлівасць да нашых праблем, але і сваю поўную беспакаранасць за парушэнне заканадаўства".

Аўтары звароту нагадваюць, што паводле Канстытуцыі ўлада ў Рэспубліцы Беларусь належыць народу. "Вы таксама ўвесь час выступаеце ад імя народа. Аднак мы – прадстаўнікі беларускага народа – ніяк не можам вырашыць свае праблемы ва ўласнай краіне. Так каму ж належыць улада ў Рэспубліцы Беларусь? У нас складаецца ўражанне, што ўлада ў краіне належыць службоўцам", – мяркуюць аўтары ліста.

Яны выказваюць надзею, што Лукашэнка "ініцыюе стварэнне спецыяльнай парламенцкай камісіі па пераглядзе грамадзянскіх і крымінальных спраў, бо службоўцы суду і пракуратуры не збіраюцца выпраўляць свае памылкі".

Аўтары звароту заяўляюць пра ўпэўненасць у сваёй правасці і маюць намер "дамагацца справядлівасці ўсімі метадамі, прадстаўленымі грамадзянам Беларусі Асноўным законам краіны".