Лукашэнка не будзе сустракацца з Юшчанкам?
3- 24.06.2008, 18:01
Інфармацыя аб сустрэчы Аляксандра Лукашэнкі і Віктара Юшчанкі пакуль не знаходзіць свайго пацверджання.
Намміністра замежных справаў Беларусі Ігар Петрышэнка аспрэчыў чуткі аб сваіх перамовах з украінскім калегам Канстанцінам Елісеевым з нагоды падрыхтоўкі сустрэчы прэзідэнтаў дзвюх краін.
Паведамлялася, што 27 чэрвеня ў Чарнігаве Аляксандр Лукашэнка павінен сустрэцца з Віктарам Юшчанкам. Па інфармацыі "Еўрарадыё", тыдзень таму ў Менску адбыліся перамовы І.Петрышэнкі і К.Елісеева, на якіх была дасягнутая дамоўленасць аб візіце.
Паміж тым, у інтэрв'ю БелаПАН намміністра замежных спраў Беларусі Ігар Петрышэнка цалкам аспрэчыў гэтую інфармацыю.
"Не ведаю я ні аб якой сустрэчы, яе не было", — заявіў ён.
Тым не менш ён адмовіўся адказаць на пытанне, ці вядзецца наогул падрыхтоўка візіту Аляксандра Лукашэнкі ва Ўкраіну.
Маўчыць па гэтай падставе і прэс-служба беларускага кіраўніка.
- У мяне няма інфармацыі на гэты конт, - заявіў 23 чэрвеня "Салідарнасці" Павел Лёгкі, прэс-сакратар Аляксандра Лукашэнкі. - Але не скажу, што такая сустрэча не магчымая: я магу даведацца аб ёй не першым.
