Яшчэ адна крымінальная справа супраць дырэктара дзяржпрадпрыемства

Пракуратура Магілёўскай вобласці завяла яшчэ адну крымінальную справу па фактах прычынення шкоды РУВП "Ольса". Гэтым разам пад крымінальны пераслед патрапіў яго генеральны дырэктар Генадзь Матлахаў.

Буйное дзяржаўнае прадпрыемства спецыялізуецца ў выпуску кемпінгавай мэблі і мэблі медыцынскага прызначэння для ўстановаў аховы здароўя. З палову прадукцыі ідзе ў Расею, Украіну, Казахстан і краіны Балтыі, піша "Ежедневник".

Упраўленне па барацьбе з эканамічнымі злачынствамі МУС зацікавілася дзейнасцю РУВП "Ольса" яшчэ ў пачатку 2008 года. У сакавіку пракуратурай Магілёўскай вобласці была заведзена першая крымінальная справа. Спачатку па факце прычынення прадпрыемству шкоды на суму больш чым у 300 тыс. даляраў.

Праз два месяцы крымінальная справа была заведзена ўжо адносна камерцыйнага дырэктара Змітра Іёрына, якога завінавацілі ў здзяйсненні злачынства па ч.3 арт.424 КК РБ (злоўжыванне ўладай ці службовымі паўнамоцтвамі, здзейсненае службовай асобай на адказнай пасадзе, альбо пры выкананні функцыяў па раздзяржаўленні ці прыватызацыі дзяржаўнай маёмасці, альбо з цяжкімі наступствамі).

Камерцыйны дырэктар падазраваўся ў тым, што дзейнічаў у асабістых інтэрасах і прычыніў прадпрыемству шкоду памерам у 1,03 млрд рублёў.

І вось у часе папярэдняга разгляду, ужо праз месяц, пракуратура Магілёўскай вобласці заводзіць яшчэ адну крымінальную справу – адносна генеральнага дырэктара РУВП "Ольса" Генадзя Матлахава. Яму таксама інкрымінуецца ч.3 арт.424 КК РБ. Нібыта з кастрычніка 2005-га па снежань 2007 года, злоўжываючы службовымі паўнамоцтвамі, ён прычыніў прадпрыемству шкоду на суму ў 2,8 млрд рублёў.

Як бачна, нанесеная РУВП "Ольса" шкода павялічваецца ажно-такі ў геаметрычнай прагрэсіі. А разгляд справы яшчэ далёкі ад сканчэння. На самім прадпрыемстве па-ранейшаму адмаўляюцца каментаваць крымінальны пераслед кіраўнікоў.