Хілары Клінтан заклікала падтрымаць Барака Абаму

Хілары Клінтан, якая прэтэндавала на вылучэнне кандыдатам на пост прэзідэнта ЗША ад Дэмакратычнай партыі, абвясціла пра завяршэнне сваёй выбарчай кампаніі.

Як перадае агенцтва France Presse, у часе суботняга выступу ў Нацыянальным музеі дойлідства ў Вашынгтоне, Клінтан заклікала прыхільнікаў зрабіць усё магчымае, каб абраць наступным прэзідэнтам Барака Абаму, і агучыла гатовасць цалкам яго падтрымаць.

Абвестка пра выйсце Клінтан з перадвыбарнай гонкі чакалася з 3 чэрвеня, калі адбыліся апошнія ў гэтай кампаніі праймэрыз у штатах Паўднёвая Дакота і Мантана. Былая першая лэдзі значна адстала ад Абамы па колькасці дэлегатаў, гатовых падтрымаць яе на з'ездзе дэмакратаў па вылучэнні кандыдата ў прэзідэнты.

У пятніцу былая прэтэндэнтка на прэзідэнцкі пост зладзіла для ўсіх супрацоўнікаў свайго перадвыбарнага штабу развітальную вечарыну, на якую прыйшло з пяцьсот чалавек.

На думку аналітыкаў, Клінтан магла б працягнуць перадвыбарную кампанію ў якасці кандыдата на пост віцэ-прэзідэнта ў пары з Абамам. Аднак сенатар ад штата Ілінойс пакуль не вызначыўся з кандыдатурай намесніка.