Францыя становіцца старшынёй Еўразвяза (Відэа)

Прэзідэнт Францыі Нікаля Сарказі сёння прымае эстафету старшынства ў Радзе Еўрапейскага Звяза. Ён заменіць на гэтым пасту прэм'ер-міністра Славеніі Янэза Яншу.

Прэзідэнцтва ў Радзе Еўразвяза ажыццяўляецца дзяржавамі-сябрамі ЕЗ у парадку, аднагалосна вызначаным Радай, звычайна ратацыя адбываецца па прынцыпе вялікая — малая дзяржава, заснавальнік — новы сябра і г. д. Ратацыя адбываецца раз у шэсць месяцаў.

Падчас свайго старшынства Францыя мае намер засяродзіць увагу на чатырох прыярытэтах: абароне навакольнага асяроддзя, іміграцыі, абароне, сельскай гаспадарцы.

Па словах прэзідэнта краіны Нікаля Сарказі, галоўнай мэтай Францыі стане вывад Еўразвяза з інстытуцыйнага крызісу, пасля таго, як жыхары Ірландыі на рэферэндуме адмовіліся прыняць Лісабонскую дамову.

Ён таксама заявіў, што будзе імкнуцца надаваць больш увагі праблемам, якія турбуюць еўрапейскіх выбаршчыкаў.

"Еўропа турбуецца і, што яшчэ горш, патроху нашыя грамадзяне пачынаюць задавацца пытаннем, ці не апынецца ў канчатковым выпадку так, што дзяржаўныя ўлады будуць абараняць іх інтэрасы эфектыўней, чым еўрапейскія", - сказаў французскі прэзідэнт.