Катастрафічна не хапае грошай

Начальнік упраўлення рэфармавання дзяржаўнай уласнасці Фонду дзяржмаёмасці Дзяржкаммаёмасці Ірына Баркоўская заявіла, што абвешчаная ў Беларусі масавая прыватызацыя выкліканая неабходнасцю «ажыўлення эканомікі прадпрыемстваў» за кошт знешніх рэсурсаў.

"Мы павінныя сыходзіць ад практыкі аказання дапамогі дзяржавай прадпрыемствам. Хаця, магчыма, нейкім асабліва значным з іх дзяржава будзе прадастаўляць падтрымку. Але для ажыўлення эканомікі прадпрыемстваў яны павінныя шукаць знешнія рэсурсы. На гэта і накіраваны план прыватызацыі", - падкрэсліла яна.

Начальнік упраўлення фонду таксама паведаміла, што з прыняццем дадзенага плану прыватызацыі ў Дзяржкаммаёмасці разгортваецца вялікая праца з міністэрствамі і ведамствамі, прадпрыемствамі. На тых прадпрыемствах, якія плануецца акцыянаваць у 2008 годзе, неабходна правесці ўсе неабходныя праверкі для падрыхтоўкі дакументаў на прыватызацыю.

Прыватызацыя кожнага беларускага прадпрыемства будзе праходзіць у індывідуальным парадку з улікам значнасці для дзяржавы, паведаміла чыноўніца.

"У некаторых нашых дырэктараў заводаў ёсць асцярогі, што расейскі капітал прыйдзе і ўсё павыкупляе. Але мы гэтага дапускаць не будзем. Хоць мы і абвясцілі масавую прыватызацыю, але падыход да яе ажыццяўлення будзе індывідуальны… Будзем глядзець, наколькі гэта значнае для нас прадпрыемства і якая зацікаўленасць у ім інвестараў. Таксама будзем вызначацца і з кожным пэўным інвестарам - пры стварэнні ААТ, альбо потым пры продажы акцый, каб ведаць, які пакет акцый ім прапанаваць", - перадае БелТА словы Ірыны Баркоўскай.

Яна не выключае, што на першапачатковым этапе інвестарам будуць прапанаваныя пакеты акцый да 25% ад статутнага фонду. "Як правіла, такія пакеты ўжо цікавяць інвестараў, гэта дае ім рэальную ўладу ў створаным грамадстве", - падкрэсліла спецыяліст.