Адкрыццё станцыі метро «Кастрычніцкая» пераносіцца

На «Кастрычніцкай» пачалі збіраць новыя эскалатары. Але станцыя метро можа адкрыцца не раней за кастрычнік.

Перасадкавая станцыя менскага метро зачыненая амаль два месяцы, і, здаецца, пасажыры ўжо звыкліся з часовымі нязручнасцямі. Але адзінае пытанне па-ранейшаму хвалюе ўсіх: калі жа «Кастрычніцкая» зноў запрацуе? Аб'яваў на гэты конт у самім метро няма, у наземным транспарце - тым больш.

За адказамі газета “Рэспубліка” звярнулася ў дырэкцыю па будаўніцтве Менскага метрапалітэна. Там растлумачылі: з 9 чэрвеня на «Кастрычніцкай» цалкам дэмантавалі старыя эскалатары і іх падмурак. Адбілі перфаратарамі 80 кубаметраў бетону. Яго дастаўлялі на паверхню ўручную і вывозілі начнымі рэйсамі. Наступны крок - заліванне новага падмурка - таксама завершаны. Зараз найважнейшы этап - усталёўка новых эскалатараў, якія спецыяльна для Менска былі вырабленыя ва Ўкраіне. Але ў Беларусі не знайшлося спецыялістаў, здольных выконваць працу такой складанасці, таму мантажнікаў прыйшлося шукаць за мяжой.

- Дамова падпісаная з вядомай расейскай кампаніяй з Санкт-Пецярбурга, якая займаецца мантажом, рамонтам і абслугоўваннем эскалатараў. У нядзелю тры брыгады прыбылі ў Менск і ў панядзелак прыступілі да працы, - кажа Аляксей Мурач, галоўны інжынер КУП «Дырэкцыя па будаўніцтве Менскага метрапалітэна». - Сёння тэрміны завяршэння ўсіх прац удакладняюцца. Арыентыровачны час канчатка мантажу - канец верасня.

У піцерскай кампаніі, куды датэлефанаваліся журналісты, удакладняюць, што задачы перад мантажнікамі стаяць складаныя.

- Па дамове нашыя адмыслоўцы павінныя былі прыбыць у Менск і пачаць мантаж эскалатараў яшчэ 14 ліпеня. Але да гэтага часу пляцоўка на «Кастрычніцкай» была не гатовая, - кажа Яўгей Маневіч, начальнік камерцыйнага аддзела ЗАТ «ЭС-сэрвіс». - Значыць, улічваючы ўвесь аб'ём прац, эскалатары будуць сабраныя бліжэй да сярэдзіны кастрычніка.

Цяпер у Менску працуюць 15 супрацоўнікаў піцерскай кампаніі. На наступным тыдні прыедуць яшчэ 10 спецыялістаў. Ім яшчэ не даводзілася працаваць з эскалатарамі такой мадэлі.

Мантажнікам з Санкт-Пецярбурга дапамагаюць працаўнікі Менскага метрапалітэна.

“Гэта выдатная магчымасць набрацца досведу. Бо ў будучыні папросяць замены састарэлыя эскалатары і на іншых станцыях метро. А запрашаць замежных адмыслоўцаў, мусіць, нятанна”, -- рэзюмуе афіцыйная газета.