Агенцтва Standard & Poor's: у Беларусі адна з самых слабых банкаўскіх сістэм

Міжнароднае рэйтынгавае агенцтва Standard&Poor's абвясціла аб тым, што банкаўская сістэма Беларусі аднесеная да дзявятай групе па метадалогіі адзнакі банкаўскіх і краінавых рызык (BICRA).

Агенцтва падзяліла банкаўскія сістэмы краін на дзесяць груп: наймацнейшыя ўвайшлі ў першую групу, а самыя слабыя – у дзясятую, піша Тэлеграф.

"Падставамі для нашай адзнакі з'яўляюцца высокі ўзровень галіновых і краінавых рызык у Беларусі, а таксама ранняя стадыя развіцця банкаўскай сістэмы, якая хутка расце на фоне некаторых недахопаў у істытуцыянальным і прававым асяроддзі", — перадаюць "Белорусские новости" словы крэдытнага аналітыка Standard&Poor's Яўгена Тарзіманава.

З іншых краін у дзявятую групу ўвайшлі Нігерыя, Коста-Рыка, Гватэмала, Лівія і В'етнам. Па ўзроўні BICRA Беларусь апярэджвае Ўкраіну (дзясятая група), але адстае ад Расеі і Казахстана (восьмая група).

Standard&Poor's падкрэслівае, што асноўная частка капіталу банкаўскай сістэмы Беларусі належыць дзяржаве. Адзначаецца таксама вельмі высокая ступень канцэнтрацыі банкаўскага бізнэсу: у 2007 годзе больш за 75% сукупных актываў банкаўскай сістэмы кантралявалі чатыры дзяржбанкі.

У агенцтве таксама адзначылі, што адэкватная капіталізацыя банкаўскай сістэмы і досыць высокая рэнтабельнасць забяспечваюць нядрэнны рэзервовы запас, які павінен дазволіць банкам пераадолець магчымыя фінансавыя цяжкасці.