Актывістаў Партыі БНФ не пускаюць ва ўчасткавыя камісыі

Апошнія дні сталі неспакойнымі для прадстаўнікоў дэмакратычных партыяў, якія прасунулі свае кандыдатуры ва ўчасткавыя выбарчыя камісыі.

Як паведамілі чальцы ініцыятыўнай групы Віктара Івашкевіча, спіс прадстаўнікоў ва ўчасткавыя камісыі па 97-ай Кастрычніцкай акрузе ад Партыі БНФ быў пададзеным у адміністрацыю Кастрычніцкага раёну 7 жніўня ў першай палове дня. Ужо ўвечар таго сама дня дзвум з гэтага спісу адтуль патэлефанавалі, удакладнілі, ці сапраўды яны прэтэндуюць на ўключэнне ў камісыю, і запрасілі прыйсці ў адміністрацыю, не растлумачыўшы прычынаў.

Чальцы БНФ, прасунутыя ў склад камісыяў на тэрыторыі 99-ай Паўднёва-Заходняй выбарчай акругі, таксама літаральна адразу ж адчулі на сабе ціск. Па словах Юрася Карэтнікава, прэтэндэнта ў кандыдаты па гэтай акрузе, спіс прадстаўнікоў быў пададзеным ў раённую адміністрацыю 7 жніўня ў другой палове дня, а раніцай 8-го жніўня некаторым з іх ужо патэлефанавалі з прапановамі адмовіцца ад чалецтва ва ўчасткавых камісыях і запрашэннем на «гутарку». У дадзеным выпадку ціск быў з боку адміністрацыяў працоўных калектываў і навучальных установаў.