Салідарнасць у імя Свабоды

13.10.2009, 9:54

Чатыры гады запар праходзяць Дні Беларускай Салідарнасці. Лідэры апазіцыі заклікалі беларусаў выйсці 16 кастрычніка ў 18.00 на Кастрычніцкую плошчу Менска.

Падаем зварот беларускіх дэмакратычных лідэраў:

16 кастрычніка 2005 году прайшоў першы Дзень салідарнасці. Тады дзесяткі тысячаў нашых суайчыннікаў запалілі ў сваіх дамах свечкі з мэтай прыцягнуць увагу да рэпрэсіяў, якія адбываюцца ў нашай краіне.

На працягу чатырох год 16 чысла кожнага месяца беларусы праводзяць акцыі ў падтрымку палітвязняў і сем'яў зніклых грамадскіх дзеячоў. За гэты час наша салідарнасць і ціск на рэжым з боку дэмакратычных краінаў свету дапамаглі вызваленню з-за кратаў многіх актывістаў апазіцыі.

Нажаль, галоўная мэта дзён салідарнасці да гэтага часу не дасягнутая. У Беларусі працягваюцца палітычныя рэпрэсіі, за кратамі застаюцца вязні сумлення Мікалай Аўтуховіч, Уладзімір Асіпенка і Арцём Дубскі. Разганяюцца мірныя вулічныя акцыі апазіцыі. Улады ўжываюць новыя формы ізаляцыі маладзёжных актывістаў - гвалтоўны прызыў у войска і хатні арышт.

Адзінае, чаго па-ранейшаму баіцца дыктатура, - гэта наша салідарнасць. Толькі яе дэманстрацыя праз вулічныя акцыі можа прымусіць улады спыніць рэпрэсіі і вызваліць палітвязняў, як гэта ўжо было раней.

Мы заклікаем усіх неабыякавых беларусаў у Дзень салідарнасці 16 кастрычніка выйсці на Кастрычніцкую плошчу з партрэтамі беларускіх вязняў сумлення і звярнуцца да ўладаў з патрабаваннем пачаць рэальную лібералізацыю ў краіне, якая магчымая толькі пры спыненні палітычных рэпрэсіяў.

Свабоду палітвязням! Не - палітычным рэпрэсіям!

Яўген Афнагель, каардынатар грамадзянскай кампаніі «Еўрапейская Беларусь»,

Зміцер Дашкевіч, старшыня «Маладога Фронту»,

Андрэй Крэчка, старшыня «Моладзі БНФ»,

Анатоль Лябедзька, кіраўнік Аб'яднанай Грамадзянскай Партыі»