Міністэрства па падатках і зборах: ПДК неабходна падвысіць да 20%

Захаванне стаўкі ПДК запатрабуе скарачэння сацыяльных выдаткаў бюджэта, заяўляюць у МПЗ.

Намеснік міністра па падатках і зборах Беларусі Васіль Каменка лічыць, што захаванне бягучай стаўкі ПДК на фоне адмены з 2010 года 4 падаткаў і збораў можа прывесці да неабходнасці скарачэння сацыяльных выдаткаў бюджэта, перадае «Интерфакс».

«Мы аблічылі: адмена 4 падаткаў, у тым ліку збору ў фонд падтрымкі сельгасвытворцаў, прывядзе да недапаступлення ў бюджэт Br2,4 трлн. На ахову здароўя ў 2010 годзе запланавана выдаткаў на Br5,3 трлн. Палова фінансавання аховы здароўя не будзе забяспечана, калі дзяржава не вырашыць праблему пошуку грошай», - заявіў В.Каменка на брыфінгу ў аўторак.

«Гэта падвышэнне стаўкі ПДК да 20% аб’ектыўная неабходнасць. Калі дзесьці дзяржава зніжае падаткі заўжды будуць шукацца прыбытковыя крыніцы ў іншым месцы», - адзначыў намміністра.

Раней паведамлялася, што з крытыкай пазіцыі ўрада адносна падвышэння стаўкі ПДК з 2010 года з 18% да 20% выступіў 30 кастрычніка намеснік кіраўніка адміністрацыі прэзідэнта Леанід Анфімаў, якому Аляксандр Лукашэнка даручыў разам з кіраўніком Нацбанка Пятром Пракаповічам завяршыць распрацоўку праектаў прагнозу росту эканомікі ў 2010 годзе ў месячын тэрмін.

Мінфін патлумачыў падвышэнне стаўкі ПДК неабходнасцю частковай кампенсацыі страт прыбыткаў бюджэта ў сувязі з плануемай адменай шэрагу падаткаў, у прыватнасці 1% ад выручкі ў выглядзе адлічэння ў фонд падтрымкі сельгасвытворцаў. У выніку плануемай адмены шэрагу падаткаў рэсурсы бюджэта ў 2010 годзе скарачаюцца на Br2,3 трлн, а падвышэнне стаўкі ПДК дазволіць кампенсаваць Br1,4 трлн.

Такім чынам, падатковая нагрузка ў 2010 годзе скароціцца на Br0,9 трлн, ці на 0,6% ВУП пры ўмове падвышэння стаўкі ПДК да 20%, заяўляюць у Міністэрстве па падатках і зборах.