«Антыкрызісная» праграма Лукашэнкі: грошы з дзяржбюджэту пойдуць на будаўніцтва 19 лядовых палацаў

Ва ўмовах эканамічнага крызісу ў 2009 годзе ў Беларусі будзе пабудавана 19 лядовых палацаў. На іх узвядзенне плануецца накіраваць 70 мільярдаў рублёў.

Дзе і якія лядовыя арэны павінныя з'явіцца ў бліжэйшыя гады, вызначана ўказам Лукашэнкі «Аб сцвярджэнні Дзяржаўнай інвестыцыйнай праграмы на 2009 год».

У праграме акрамя пераліку будоўляў і аб'ектаў камунальнай уласнасці, якія плануецца пабудаваць, выразна распісана і якія сродкі з рэспубліканскага бюджэту будуць вылучаныя на гэтыя патрэбы ў 2009 годзе. Лядовыя палацы будуць узводзіць практычна ва ўсіх абласцях рэспублікі.

У Брэсцкай вобласці лядовыя арэны плануецца пабудаваць у Драгічыне, Лунінцы, Кобрыне, Баранавічах; у Віцебскай вобласці — у Глыбокім, Лепелі, Навалукомлі; у Гарадзенскай вобласці — у Ваўкавыску, Лідзе, Слоніме. У лідэрах — Магілёўская вобласць. Тут будаўніцтва лядовых палацаў запланавана адразу ў васьмі райцэнтрах – у Глуску, Горках, Клічаве, Касцюковічах, Крычаве, Асіповічах, Чавусах і Шклове. Сіратліва на гэтым фоне выглядае Гомельская вобласць. У гэтым рэгіёне, як адзначае «Заўтра тваёй краіны», у бліжэйшыя годы можа з'явіцца толькі адна лядовая арэна, прычым, у самім Гомелі ў мікрараёне «Гомсельмаш».

Толькі ў 2009 годзе на ўзвядзенне 19 новых лядовых арэн плануецца накіраваць, як мінімум, 70 млрд. рублёў. Хоць, не выключана, што з улікам дэвальвацыі, гэтыя сумы будуць павялічаныя.

Акрамя таго, па паведамленні старшыні Федэрацыі хакея Ўладзіміра Навумава, у цяперашнім годзе пачнецца будаўніцтва яшчэ аднаго новага буйнога лядовага палаца ў Менску. Новая сталічная лядовая арэна будзе змяшчаць 7,7 тыс. гледачоў. Новабудоўля з'явіцца ў сталічным мікрараёне Чыжоўка.

Па словах Навумава, «праект «Чыжоўка-Арэна» вельмі цікавы. Інвестыцыі ідуць з ААЭ. На «Чыжоўка-Арэне» будзе тры пляцоўкі Раён густа заселены, і ад жадаючых займацца хакеем не будзе адбоя».