У Беларусі адбіткі пальцаў будуць масава браць і ў жанчын
27- 2.04.2009, 11:58
Хуткм часам супрацоўнікі МУС уключаць у масавую дактыласкапію і беларускіх жанчын нібыта для фарміравання нацыянальнай базы дактыласкапічных дадзеных.
На працягу 9 месяцаў беларуская міліцыя зняла адбіткі пальцаў больш чым у паловы мужчынскага насельніцтва краіны. Прычынай для правядзення незаконнай масавай дактыласкапіі стаў выбух 4 ліпеня 2008 года ў Менску. Як падкрэслівае «Радыё Свабода», у выніку беспрэцэдэнтнай акцыі міліцыя сабрала мільёны адбіткаў пальцаў, з дапамогай якіх ужо можна ствараць нацыянальны банк дактыласкапічных дадзеных.
Кіраўнік упраўлення ўнутраных спраў Фрунзенскага раёна Менска Алег Гайдукевич заявіў, што супрацоўнікі міліцыі возьмуць адбіткі пальцы і ў жанчын.
«Да жанчын яшчэ дойдзем», - сказаў ён. Алег Гайдукевич таксама адзначыў, што наступнаму пакаленню міліцыянтаў «будзе значна лягчэй, калі ўсе адбіткі пальцаў будуць у базе дадзеных».
Таксама супрацоўнік МУС адзначыў, што базай дадзеных адбіткаў можна скарыстацца ўжо зараз.
«Вядома, у нас няма такога, каб у кожным кабінеце супрацоўнік мог гэта паглядзець. Але хацелася бы, каб так было. Гэта зручна. Выпадкі адмовы адзінкавыя», - сказаў Алег Гайдукевич.
Ён падкрэсліў, што пры выкарыстанні інфармацыі з банка дадзеных у міліцыі праблем няма.
