Улады Беларусі афіцыйна папрасілі ў Масквы 9 мільярдаў даляраў на будаўніцтва АЭС
25- 2.06.2009, 14:15
Афіцыйны Менск накіраваў Расеі афіцыйны запыт аб выдачы крэдыту на будаўніцтва АЭС.
Пра гэта 2 траўня паведаміў дырэктар дэпартамента па ядзернай энергетыцы Міністэрства энергетыкі Мікалай Груша, паведамляе БелаПАН.
Паводле яго словаў, 6—6,5 млрд. даляраў плануецца выдаткаваць на будаўніцтва самой АЭС, астатнія — на стварэнне неабходнай інфраструктуры.
«Акрамя таго, падчас перамоваў беларускі бок дамогся, каб расейскі бок прыняў ўдзел і ў фінансаванні будаўніцтва транспартнай, прамысловай інфраструктуры. Расейскі бок у прынцыпе пагадзіўся з такім падыходам і рэкамендаваў нам звярнуцца да ўрада», — паведаміў ён.
У студзені 2009 года на перамовах з гендырэктарам расейскай дзяржаўнай карпарацыі «Расатам» Сяргеем Кірыенкам ў Менску першы віцэ-прэм'ер Беларусі Уладзімір Сямашка пацвердзіў гатоўнасць уладаў да рэалізацыі праекту будаўніцтва АЭС, генеральным падрадчыкам якога выступіць расейскае ЗАТ «Атамбудэкспарт».
Адзначым, што намер уладаў будаваць АЭС выклікаў пратэсты з боку навукоўцаў і насельніцтва. Беларусь з'яўляецца краінай, найбольш пацярпелай ад аварыі на Чарнобыльскай АЭС. Навукоўцы выступаюць за недапушчальнасць размяшчэння на тэрыторыі краіны ядзернай зброі і яе элементаў, будаўніцтва АЭС і захоўвання ядзерных адыходаў.