За патрабаванне вызваліць палітвязняў апазіцыянера пакаралі штрафам

8 ліпеня адміністрацыйнай камісіяй Фрунзенскага раёна Менска быў разгледжаны пратакол, складзены ў адносінах актывіста грамадзянскай кампаніі «Еўрапейская Беларусь» Рыгора Лаўроўскага.

Моладзевы актывіст абавязаны выплаціць 175 тысяч беларускіх рублёў штрафу за вывешванне расцяжкі «Свабоду палітвязням!», паведамляе сайт f-fight.org.

Нагадаем, што Рыгор Лаўроўскі быў затрыманы ў Менску 28 мая 2009 года. Апазіцыянер вывешваў расцяжку са словамі «Свабоду палітвязням!» на вуліцы Прытыцкага.

Яго і яшчэ аднаго актывіста «Еўрапейскай Беларусі» затрымаў патруль міліцыі, што праязджаў. Маладыя людзі былі дастаўленыя ў Фрунзенскі РУУС, дзе ў іх былі ўзятыя адбіткі пальцаў. Таксама на моладзевых актывістаў былі складзеныя адміністрацыйныя пратаколы за «парушэнне добраўпарадкавання населеных пунктаў». Акрамя таго, супрацоўнікі міліцыі забралі расцяжку. Праз тры гадзіны маладыя людзі былі вызваленыя.