Памочнік Лукашэнкі напісаў заяву аб сыходзе

У найбліжэйшыя дні ў беларускага кіраўніка з'явіцца новы памочнік па пытаннях фізічнай культуры, спорту і развіцця турызму.

Зараз гэтую пасаду займае Генадзь Аляксеенка. Сайт «Мы» распытаў яго пра тое, што стаіць за адстаўкай.

- З гэтай працы самастойна не сыходзяць, - заўважыў чыноўнік. - У нас ёсць каму вырашаць гэтыя пытанні. Мяне спыталі, я напісаў заяву. Пакуль з'ездзім на Алімпіяду, а там будзе відаць. Буду працаваць у НАК, а пасля Алімпійскіх гульняў, пасля сходу, будзе відаць, як і дзе мяне будуць выкарыстоўваць…

Генадзь Аляксеенка кажа, што зусім не засмучаны адстаўкай, якая мае адбыцца:

- Я рыхтаваўся да гэтага прыкладна паўгады таму.

Аляксеенка выдатна ведае, што не ўсе з захапленнем і кампліментамі ўспрымалі яго дзейнасць на пасадзе памочніка прэзідэнта - першага віцэ-старшыні НАК.

- Ну а хто ж будзе хваліць? - перапытвае ён. - Але мне за сваю працу не сорамна.

Хто прыйдзе на змену?

Сярод верагодных прэтэндэнтаў на крэсла, у якім пакуль яшчэ сядзіць Генадзь Аляксеенка, называюць два прозвішчы- дырэктара Рэспубліканскага цэнтра алімпійскай падрыхтоўкі па тэнісе Сяргея Цяцерына і «дынамаўца» Ігара Заічкава. Прычым Цяцерына ва ўладу народная пагалоска вяртае ўжо не ў першы раз. І кожны раз яму прадказваюць новае месца працы ў вярхах. Але, хутчэй за ўсё, на месца Аляксеенкі будзе прызначаны малавядомы шырокай публіцы Заічкаў. Мяркуецца, што яго прызначэнне адбудзецца ўжо ў гэтую пятніцу.