Пракуратура лічыць, што апазіцыянер збіў сябе сам

Пракуратура Петрыкаўскага раёна адмовіла ва ўзбуджэнні крымінальнай справы па скарзе Кастуся Жукоўскага, збітага супрацоўнікамі міліцыі на фэсце «Кліч Палесся».

Нагадаем, апазіцыянер быў збіты невядомымі 17 верасня на фэсце «Кліч Палесся» ў Петрыкаўскім раёне. Там жа ён быў затрыманы, абвінавачаны ў нецэнзурнай лаянцы і непадпарадкаванні супрацоўнікам міліцыі. Пасля суд пакараў Жукоўскага за гэтыя правапарушэнні 10-сутачным арыштам.

Апазіцыянер напісаў скаргу ў пракуратуру, у якой паведаміў, што 17 верасня ў Ляскавічах яго збілі трое супрацоўнікаў міліцыі. Згодна з паказаннямі Жукоўскага, на яго напалі невядомыя, не назваліся, завялі ў фае гатэлю «Над Прыпяццю» і збілі. Затым на яго ж былі складзеныя пратаколы за нецэнзурную лаянку і непадпарадкаванне супрацоўнікам міліцыі. Заяўнік прасіў пракуратуру прыцягнуць вінаватых да адказнасці, нагадвае БелаПАН.

Пракуратура апытала супрацоўнікаў палка ППСМ УУС і прыйшла да высновы, што Жукоўскага ніхто не збіваў. Пасля праведзенай праверкі пракуратура прыйшла да высновы, што ў дзеяннях міліцыянтаў адсутнічаў склад злачынства, а пабоі Жукоўскі прычыніў сабе сам, калі падаў.