Журналіста «Голаса Расеі» пазбавілі ў Беларусі акрэдытацыі

Яўгену Агурцову забаранілі працаваць без якіх-небудзь тлумачэнняў.

Беларускі МЗС пазбавіў акрэдытацыі для працы ў Беларусі карэспандэнта радыёстанцыі «Голас Расеі» Яўгена Агурцова.

Пакуль не вядома, што стала прычынай для прыняцця такога жорсткага рашэння ў дачыненні да вядомага беларускага журналіста. Яўген Агурцоў - грамадзянін Беларусі і выслаць з краіны ўлады яго не могуць. Але яны пазбавілі яго працы, піша «Беларускі партызан».

Яго апошні каментар для радыёстанцыі «Голас Расеі» быў даволі ўзважаным і змяшчаў усяго толькі інфармацыю пра выбары. Не выключана, што беларускія ўлады помсцяць радыёстанцыі за рэзкія сюжэты пра Лукашэнку.

«Самае лепшае выхаваўчае мерапрыемства беларускіх ідэолагаў - узорна-паказальна пакінуць чалавека без працы. Бо гэта толькі здаецца, што журналісту лёгка сарвацца з месца і пераехаць у іншую краіну. Лёгка маладым, якім усё роўна, дзе пачынаць, і тым, каго ў Беларусі не трымаюць ні блізкія людзі, ні абавязальніцтвы. Таму з'язджаюць адзінкі. А пакінутым трэба мець нямала мужнасці, каб сумленна выконваць сваю працу, нават нягледзячы на пастаянную пагрозу яе страціць», - лічыць шэф-рэдактар газеты «Народная воля» Святлана Калінкіна.