Заўтра вырашаць, ці выпускаць да суда зняволеных у КДБ

Заўтра павінна адбыцца судовае паседжанне, на якім будуць разглядацца скаргі адвакатаў усіх затрыманых у КДБ.

У панядзелак адбыўся другі допыт Віталя Рымашэўскага, падчас якога з ім другі раз змог сустрэцца яго адвакат. Стан здароўя Віталя здавальняючы, нягледзячы на пэўныя праблемы. Экс-кандыдат у прэзідэнты ад БХД трымаецца мужна, цвёрда стаіць на сваёй пазіцыі, што акцыя была мірная і ён зрабіў усё, што ад яго залежала, каб прадухіліць правакацыі, звязаныя зь біцьцём вокан у доме ўрада, паведамляе прэсавая служба БХД.

Таксама стала вядома, што ў сераду ў 9-30 раніцы павінна адбыцца судовае паседжанне, на якім будуць разглядацца скаргі адвакатаў усіх затрыманых у КДБ, зьвязаныя са змяненнем меры стрымання ў выглядзе ўтрымання пад вартай. Адвакат Рымашэўскага таксама падаў скаргу на зьмяненьне меры стрымання на падпіску аб нявыездзе. Ён упэўнены, што падпіскі аб нявыездзе будзе цалкам дастаткова для працягнення расследавання.