На выбарнікаў уздзейнічаюць праз дзяцей

У Добрушы педагогі знаёмяць школьнікаў з асновамі Выбарчага кодэкса.

«Дзень галасавання стане святам», - абяцае сваім чытачам раённая газета «Добрушскі край».

Як стала вядома «Праваабаронцам за свабодныя выбары», «да асноўнага дня галасавання на выбарах рыхтуюцца не толькі выбарчыя камісіі, але і школы раёна».

«У той час, калі кандыдаты ў прэзідэнты заклікаюць выбарнікаў з экранаў тэлевізараў аддаць ім свой голас, педагогі знаёмяць школьнікаў з асновамі Выбарчага кодэкса, абгрунтоўваюць неабходнасць удзелу ў выбарах кожнага грамадзяніна краіны і спадзяюцца, што праз дзяцей гэтая інфармацыя дойдзе да бацькоў», - піша выданне.

Складаецца ўражанне, што жыхары райцэнтра наогул не разбіраюцца ў палітыцы, і таму на іх трэба ўздзейнічаць праз дзяцей. Педагогі, замест таго, каб вучыць «разумнаму, добраму, вечнаму», імкнуцца неяк праз дзяцей «палітычна ўздзейнічаць» на бацькоў.

«А да 19 снежня школьнікі рыхтуюць для выбарнікаў прыемны сюрпрыз. Даўно стала традыцыяй у дзень галасавання арганізоўваць канцэрты мастацкай самадзейнасці, святы дзіцячай творчасці, і гэтыя выбары не стануць выключэннем», - абяцае раённая газета.

«Выставу сваіх працаў плануюць адкрыць наведвальнікі кружкоў «Чараўніца» і «Умелыя ручкі», пад кіраўніцтвам настаўніка спеваў і музыкі С. А. Гуцавай свае сольныя нумары рэпетуюць школьныя спевакі, танцавальны калектыў разам з кіраўніком кружка Кацярынай Чарняковай развучвае новыя танцы», - піша выданне.

Але з якой мэтай гэта робіцца? Зноў жа - з клопатам пра бацькоў! «Жадаецца, каб дзень выбараў стаў сапраўдным святам для гараджанаў. Да таго ж, гэты дзень стане і своеасаблівай творчай справаздачай для нашай школы. Калі яшчэ бацькі ўбачаць сваіх дзяцей на сцэне і змогуць сказаць знаёмым: «Гэта мой сын!», - растлумачыла газета.

Выходзіць, што школьнікі ў Добрушы маюць магчымасць выступіць на сцэне толькі падчас выбараў?