Рыгор Барадулін патрапіў у рэанімацыю з двухбаковай пнеўманіяй

Народны паэт Беларусі быў шпіталізаваны ў шпіталь Упраўлення справамі прэзідэнта. У яго ўзнялася тэмпература да 40 градусаў.

Жонка Валянціна Барадуліна выклікала хуткую дапамогу з лечкамісіі, паведамляе «Еўрарадыё».

Галоўны ўрач лечкамісіі Ірына Абельская распавяла, што паэт патрапіў шпіталь у дастаткова цяжкім стане. У яго двухбаковая вірусная пнеўманія, востры перыяд захворвання, таму яго змясцілі ў аддзяленне рэанімацыі.

Стан паэта дастаткова цяжкі. Але Ірына Абельская паведаміла, што пацыент атрымлівае ўсё неабходнае лячэнне, і выказала надзею, што ўсё будзе добра.

Нагадаем, што літаральна ў мінулую сераду Рыгор Барадулін выпісаўся з 10-га менскага шпіталя, дзе лячыўся ў аддзяленні кардыялогіі.