Навучанне ў ВНУ могуць скараціць да трох гадоў

Беларускія заканадаўцы настойваюць на скарачэнні тэрмінаў навучання ў ВНУ.

У Беларусі ўжо некалькі гадоў працуе Праграма пераходу на дыферэнцыраваныя тэрміны падрыхтоўкі спецыялістаў з вышэйшай адукацыяй. У ВНУ каля 400 спецыяльнасцяў, з якіх прыкладна па 80 студэнтаў будуць атрымліваць адукацыю ў больш кароткія тэрміны, распавёў «Завтра твоей страны» старшыня пастаяннай камісіі «палаты прадстаўнікоў» па адукацыі, культуры, навуцы і навукова-тэхнічным прагрэсе Уладзімір Здановіч.

Цяпер у беларускіх ВНУ вучацца ад чатырох да шасці гадоў. Даўжэй за іншых сядзяць на студэнцкай лаве медыкі і спецыялісты па ядзернай энергетыцы.

«У Кодэксе аб адукацыі, які павінен быць разгледжаны ў другім чытанні на вясновай сесіі ніжняй «палаты парламента», абумоўлена, што вышэйшую адукацыю можна будзе атрымаць за перыяд ад трох да пяці гадоў. Пры гэтым па найбольш складаных спецыяльнасцях тэрмін навучання можа быць павялічаны на адзін год», - кажа Уладзімір Здановіч.

Якія ж спецыяльнасці чакае скарачэнне тэрмінаў навучання?

«Штогод у спісе ВНУ спецыяльнасцяў адбываюцца змены. Магу сказаць, што тэрміны навучання зменшацца па гуманітарных кірунках, вывучэнні замежных моў, па некаторых эканамічных спецыяльнасцях. Што тычыцца тэхнічных спецыяльнасцяў, то тэрміны навучання будуць скарочаныя там, дзе гэта магчыма», - заявіў Здановіч.