НПЗ у студзені-лютым знізілі вытворчасць на 40,5%

Найбольшае падзенне аб'ёмаў вытворчасці адбылося ў аўтамабільнай і нафтаперапрацоўчай прамысловасці.

У студзені-лютым 2010 года ў Беларусі найбольшае падзенне аб'ёмаў вытворчасці па падгалінах у параўнанні са студзенем-лютым 2009 года адзначана ў аўтамабільнай (на 22,0%) і нафтаперапрацоўчай (на 40,4%) прамысловасці, паведамляе БелаПАН.

Паводле дадзеных Нацыянальнага статыстычнага камітэта, падзенне аб'ёмаў вытворчасці адбылося ў машынабудаванні і металаапрацоўцы на 2,4% у адносінах да студзеня-лютага 2009 года, а таксама ў паліўнай прамысловасці, якая прадстаўляе нафтаздабываючую і нафтаперапрацоўчую падгаліны, - на 32,4%.

У хімічнай і нафтахімічнай прамысловасці вытворчасць за два месяцы бягучага года ўзрасла на 31,6%, у прамысловасці будаўнічых матэрыялаў і харчовай - на 8,1%, лёгкай - на 7,2%, лясной, дрэваапрацоўчай і цэлюлозна-папяровай - на 0, 2%.

Найбольшы прырост прамвытворчасці за студзень-люты 2010 года адзначаны ў хімічнай прамысловасці (на 33,3%).

У цэлым па прамысловасці ў студзені-лютым 2010 года аб'ём вытворчасці павялічыўся на 4,2% у параўнанні са студзенем-лютым 2009 года і склаў 21 трлн. 69,1 млрд. рублёў.

Згодна з прагнозам сацыяльна-эканамічнага развіцця на 2010 год аб'ём вытворчасці прамысловай прадукцыі павінен вырасці ў параўнанні з 2009 годам на 10-12%.