«Гэта ж трэба так баяцца народа…»

Жыхары Оршы дагэтуль адыходзяць ад пятнічнага візіту Аляксандра Лукашэнкі на мясцовы ільнокамбінат.

Напрацягу дня ад цэнтральнай часткі горада былі адрэзаныя цэлыя мікрараёны, сотні чалавек не маглі своечасова патрапіць на працу і дадому, а паляўнічыя на пэўны час былі пазбаўленыя сваіх стрэльбаў, паведамляе «Радыё Свабода».

За дзень да лукашэнкаўскай інспэкцыі найбуйнейшага прадпрыемства рэгіёна ў горад пачалі сцягвацца міліцыянты і людзі ў цывільным. Як кажа былы працаўнік ільнокамбіната Сяргей Каспяровіч, першымі пад нагляд службы аховы прэзідэнта патрапілі ўладальнікі зарэгістраванай зброі:

«Яшчэ за некалькі дзён да візіту пазабіралі ў людзей паляўнічыя стрэльбы. У мяне адзін прыяцель ёсць, які 37 гадоў займаецца паляваннем, яго ўвесь горад ведае, дык нават у яго стрэльбу забралі. У мэтах «прафілактыкі». А ўсё таму, што жыве на праспекце Тэкстыльшчыкаў, які ўпіраецца ў Палац культуры ільнокамбіната. Відаць, небяспечная блізкасць. Пакуль стрэльбы не аддалі, ён не ведае нават, калі і чакаць назад», - - распавёў жыхар Оршы.

Каспяровіч таксама дадае, што своечасова трапіць з аднаго месца горада ў іншае было амаль немагчыма. Практычна ў аблозе аказаліся тыя, хто жыве непасрэдна ў раёне ільнокамбіната.

«Міліцыянты стаялі на кожным кроку. Асабліва быў «акупаваны» людзьмі ў пагонах раён льнокамбінату -- ад плошчы да жылых дамоў далей. Гэты квадрат у літаральным сэнсе аказаўся зонай, забароннай для перамяшчэння -- ні праехаць, ні прайсці» - кажа Каспяровіч.

Тацяна Круцько цягам дня таксама ня мела ніякай магчымасьці даехаць дадому, які стаіць на праспекце Тэкстыльшчыкаў -- іншых абыходных шляхоў на гэтым маршруце няма. Паводле яе словаў, быў перакрыты нават мост праз Дняпро, якім можна трапіць ад льнокамбінату да жылога раёна:

«Цалкам перакрылі мост на мікрараён: паралізавалі рух цалкам, нельга было праехаць. Машыны стаялі,а потым вымушаныя былі аб’яжджаць перашкоду з іншага боку горада, а гэта кіламэтраў дзесяць, калі не болей. Таксама была перакрытая плошча, цэлы дзень я не магла дадому даехаць – прыкладна ад 11 да 18 гадзінаў. Дашнікі, міліцыя стаялі, усіх разварочвалі, нікога нікуды не пускалі, ні на якія ўгаворы не рэагавалі», - распавяла жанчына.

Па словах Сяргея Каспяровіча, і сам паход Аляксандра Лукашэнкі па цэхах ільнокамбінату наўрад ці можна назваць паўнавартасным. Прыкладам, ён так і не зазірнуў у цэх першаснай апрацоўкі ільну, дзе людзі працуюць у «пячорных умовах»:

«Гэта так званая першая чарга, дзе сыравіну перапрацоўваюць на мешкавіну – гэта самы першы цыкл апрацоўкі. Што там творыцца – не перадаць словамі. Там з-за пылу не бачна ўвогуле нічога! Калі я яшчэ там працаваў, хадзіць без працягнутай рукі было немагчыма – нічога не відаць! А людзі вымушаныя працаваць проста ў нечалавечых умовах…», - кажа працоўны.

Зрэшты, стан падвышанай нервознасці суправаджае любое наведванне Аляксандрам Лукашэнкам як сталічных установаў, так і прадпрыемстваў у рэгіёнах. Пры тым, што Лукашэнка ўжо паўтары дзясяткі гадоў называе сябе выключна «народным прэзыдэнтам», ступень дыскамфорту ад надзвычайных захадаў крыху здзіўляе: як выказаўся адзін з аршанцаў, «гэта ж як трэба любіць свой народ, каб гэтак яго баяцца…».