Расея аднавіла пашпартны кантроль на мяжы з Беларуссю

На аўтобусных рэйсах з Расеі ў Беларусь уведзены пашпартны кантроль. Гэты загад дало ФСБ.

Дакументы ва ўсіх пасажыраў, якія накіроўваюцца за межы Расеі, пакуль правяраюць толькі супрацоўнікі аўтавакзалаў.

У прыватнасці, як распавёў «Еўрарадыё» жыхар Беларусі, ён сутыкнуўся ў Смаленску з падобнай сітуацыяй, калі вяртаўся на радзіму. Працаўнікі смаленскага аўтавакзала правяралі адпаведнасць фатаграфіяў і ўладальнікаў пашпартоў, а таксама дадзеныя на квітках. Асабліва ўважліва прыглядаліся да пасажыраў каўказскай знешнасці.

У кампаніі «Расейскія аўтобусныя лініі» пацвердзілі такую інфармацыю. Аднак супрацоўніца кампаніі адзначыла, што праверкі праходзяць не толькі на мяжы з Беларусяй.

- Пашпартны кантроль у вас праходзіць?

- Праходзіць.

- А з чым гэта звязана? Здаецца, не патрэбны быў ...

- З тэрактамі. У Маскве тэракты былі - усё з-за гэтага.

- У сувязі з гэтым аўтобусы, якія накіроўваюцца ў Беларусь, правяраюцца?

- Не толькі ў Беларусь - усе аўтобусы правяраюцца.

- А як доўга працягнецца такі рэжым?

- А я адкуль ведаю? У ФСБ тэлефануеце.

- Гэта значыць, гэта кіраўніцтва ФСБ вашаму кіраўніцтву такую разнарадку скінула?

- Так.

Нагадаем, што 29 сакавіка ў Маскве адбыліся два выбухі ў метро.

Дарэчы, падчас Дня Волі ў гэтым годзе менская міліцыя заяўляла пра магчымасць тэракту, які рыхтуюць нейкія «замежныя асобы». Тады меркаванай краінай, адкуль у Беларусь нібыта прыехалі тэрарысты, праваахоўнікі называлі Расею.