Станіслаў Шушкевіч стаў Камандорам (Фота)
53- 7.07.2010, 11:41
Першы кіраўнік незалежнай Беларусі Станіслаў Шушкевіч узнагароджаны крыжом Камандора ордэна Вітаўта Вялікага.
Урачыстая цырымонія прайшла 6 ліпеня ў прэзідэнцкім палацы Вільні. Прэзідэнт Літвы Даля Грыбаўскайтэ, уручаючы крыж Камандора, падзякавала Станіславу Шушкевічу за актыўную падтрымку незалежнасці Літвы ў 1991 годзе.
- Вы даеце нам магчымасць яшчэ раз праверыць сябе і сваю грамадзянскасць. Гледзячы на ваш прыклад, мы ставім для сябе ўсё больш высокія патрабаванні, - сказала Даля Грыбаўскайтэ падчас узнагароджання. - Толькі праз прасоўванне дэмакратычных каштоўнасцяў і творчага патэнцыялу Літва можа лічыцца адкрытай сучаснай дзяржавай. Я хачу павіншаваць усіх з днём дзяржаўнасці і з 600-й гадавінай бітвы пад Грунвальдам. Я жадаю вам мужнасці, рашучасці і энтузіязму.
На цырымоніі ўручэння дзяржаўных узнагарод Літвы Станіслава Шушкевіча суправаджалі яго жонка Ірына Шушкевіч, кандыдат у прэзідэнты Беларусі Андрэй Саннікаў з жонкай Ірынай Халіп і намеснік старшыні Цэнтральнай Рады Беларускай сацыял-дэмакратычнай Грамады Святлана Губейка.
Сам ардэнаносец прыехаў у Вільню напярэдадні ўвечары. Праўда, адпачыць перад цырымоніяй Шушкевічу не ўдалося: увесь вечар у яго гасцінічны нумар грукалі літоўскія журналісты, і большасць з іх пачыналі свае інтэрв'ю словамі: «Мы, вядома, разумеем, што ў вас мноства ўзнагарод, але ўсё ж такі што для вас азначае менавіта гэтая?» І не маглі паверыць, калі Шушкевіч тлумачыў ім, што гэта першая ўзнагарода ў яго жыцці.
І ўсё ж такі, што адчувае кавалер крыжа Камандора ордэна Вітаўта Вялікага?
-- Я вельмі ганаруся, бо гэта самая высокая літоўская ўзнагарода Літвы. Так атрымлівалася, што ў самыя цяжкія моманты гісторыі гэтай краіны я аказваўся побач. Напрыклад, у 1990 годзе, калі ў Вільні захапілі тэлецэнтр і была пагроза разгону парламента. Шмат у чым менавіта літоўцы адкрылі мне вочы на сутнасць савецкага рэжыму, шмат чаго мне стала зразумела, дзякуючы дзеянням літоўскіх палітыкаў, іх барацьбе за незалежнасць.
Я спадзяюся, што мая Беларусь пойдзе па гэтым шляху. Вядома, беларускае грамадства знявечанае прымусовым камунізмам значна мацней літоўскага. Але я ўпэўнены, што і наша краіна стане вольнай, незалежнай, дэмакратычнай дзяржавай і зойме годнае месца ў Эўропе. Наперадзе прэзідэнцкія выбары. Гэта пачатак пераломнага моманту, гэта змена шляху. Калі мы абярэм разумнага прэзідэнта, то пераходны перыяд да годнага жыцця будзе нядоўгім, - заявіў пасля цырымоніі ў інтэрв'ю charter97.org Станіслаў Шушкевіч.
Станіслаў Шушкевіч і Даля Грыбаўскайтэ
Станіслаў Шушкевіч з жонкай Ірынай, прэзідэнт Літвы Даля Грыбаўйскайтэ і Андрэй Саннікаў
Станіслаў Шушкевіч з жонкай Ірынай, прэзідэнт Літвы Даля Грыбаўйскайтэ і Ірына Халіп
Святлана Губейка, Ірына Шушкевіч, Даля Грыбаўскайтэ, Станіслаў Шушкевіч, Ірына Халіп, Андрэй Саннікаў
Камандор Станіслаў Шушкевіч