З «Народнай волі» не атрымалася спагнаць амаль 100 мільёнаў рублёў

Прарэктар Гомельскага ўніверсітэта Сяргей Ханеня не атрымае ад «Народнай волі» 95 мільёнаў 500 тысячаў рублёў.

Цяжка сказаць, чым кіраваўся прарэктар Гомельскага дзяржаўнага універсітэта Сяргей Ханеня, калі накіроўваў скаргу ў Ленінскі раённы суд Менска. Ён прасіў спагнаць з рэдакцыі газеты «Народная воля» на яго карысць ні многа ні мала, а… 95 мільёнаў 500 тысячаў рублёў. Хоць газета і аператыўна расставіла кропкі над «і», паведаміўшы чытачам, што ў публікацыі, у якой сярод іншых прыгадваецца і прозвішча С.Ханені, размова ідзе не пра яго гадавы заробак, а пра яго гадавы даход.

Каб пацвердзіць, што рэдакцыя гатовая давесці ўдакладненую інфармацыю да кожнага яго патэнцыяльнага выбаршчыка (у гэты час ён балатаваўся кандыдатам у дэпутаты гарадскога Савета), С.Ханеню было прапанавана ўключыць журналістаў «Народнай волі» ў агітацыйную групу. Ад такой прапановы ён адмовіўся, пры гэтым палічыў недастатковым прабачэнне газеты са сваіх старонак.

Суд першай інстанцыі вынес рашэнне поўнасцю адмовіць С.Ханеню ў яго патрабаваннях да «Народнай волі». Ён не пагадзіўся з такім вердыктам: у касацыйнай скарзе ён прасіў Менскі гарадскі суд адмяніць рашэнне суда Ленінскага раёна Менска поўнасцю і накіраваць справу на новы разгляд.

Суд і на гэты раз вынес рашэнне: недакладнасць, якая выпадкова з’явілася ў газетным матэрыяле і якая была тэрмінова выпраўленая, не прыніжае яго гонар і годнасць. Рашэнне раённага суда зацверджанае. Таму С.Ханеня не атрымае 95 мільёнаў 500 тысячаў рублёў ад «Народнай волі».