Кіроўцы выбіраюць штрафы замест тэхагляду

У Брэсцкай вобласці павялічваецца колькасць аўтамабіляў, якія не прайшлі тэхагляд.

На дадзены момант такіх больш за 30 тысяч. З прычыны цяперашняй эканамічнай сітуацыі такая працэдура стала дарагіой радасцю, піша «Ежедневник».

У Брэсцкай вобласці расце колькасць аўтамабіляў без тэхагляду. За дзесяць месяцаў бягучага года ў вобласці супрацоўнікамі ДАІ было выяўлена больш за 30 тысяч аўтамабіляў без тэхагляду, што на 5000 больш, чым за ўвесь 2010 год.

- Пры гэтым дамінуючая колькасць - кіроўцы з раёнаў, у Брэсце выяўленая мінімальная колькасць такіх аўтамабіляў, - паведамілі ў УДАІ. - Што тычыцца падробленых тэхаглядаў, то за гэты перыяд было выяўлена 10 выпадкаў, гэта на сем выпадкаў менш, чым у мінулым годзе.

Самі кіроўцы матывуюць адмову ад праходжання дзяржтэхагляду дарагім рамонтам, неабходным, каб падрыхтаваць аўтамабіль.

- Навошта мне падроблены тэхагляд? - кажа берасцеец Юрый. - Я буду ездзіць без яго. Гэта ўсё роўна больш танна абыдзецца, чым рамонт. Нават калі кожны месяц плаціць па 17.500 штрафу, то за год я заплачу каля 25 даляраў пры сённяшнім курсе. А рамонт мне абыйдзецца як мінімум у 10 разоў даражэй.

Калі ўлічваць, што жыхары Брэсцкай вобласці аддаюць перавагу былым ва ўжыванні аўтамабілям, то нескладана выказаць здагадку, што практычна ў кожнага аўтаўладальніка ёсць неабходнасць у той ці іншай ступені адрамантаваць машыну.

Кошты на рамонт у брэсцкіх майстэрняў сёння кусаюцца. Напрыклад, замена тармазных калодак каштуе 10-15 даляраў, рамонт падвескі - самага праблемнага месца ў аўтамабілі - абыйдзецца ад мільёна беларускіх рублёў толькі за працу, без уліку запчастак, пераборка рухавіка ў выпадку няспраўнасці (пры тэхаглядзе правяраецца дымнасць) будзе каштаваць каля 300-400 даляраў.

- Такая сітуацыя назіраецца ва ўсёй рэспубліцы, а не толькі ў Брэсцкай вобласці, - кажа намеснік начальніка ўпраўлення УП «Белтэхагляд» Аляксандр Сапроменка. - Сапраўды, мы назіраем зніжэнне колькасці аўтамабіляў, якія праходзяць дзяржтэхагляд на нашых станцыях. Кіроўцы кажуць, што гэта для іх дорага. А пакаранне абмяжоўваецца адносна невялікім штрафам (17 500 рублёў) і папярэджаннем. Мы ўносілі прапанову аб павышэнні штрафу да чатырох базавых велічынь. Але атрымалі адмову. Таму што, па дадзеных ДАІ, адсотак аўтамабіляў без тэхагляду, якія трапляюць у ДТЗ, даволі нізкі. Але гэта ж пакуль, калі так будзе працягвацца, то колькасць удзельнікаў ДТЗ без тэхагляду ўзрасце. Але будзе позна.