Павел Севярынец: «Трымаюся!»

Адзін з лідэраў апазіцыі Павал Севярынец даслаў з СІЗА КДБ яшчэ два лісты.

«Нарэшце я даведалася, што да яго даходзяць і мае лісты, - кажа маці палітыка Тацяна Севярынец. - У лістах, што я атрымала ад сына, Паша дзякуе за дасланыя мною лісты. Піша, што ўвесь час там чымсьці заняты - піша, чытае ... Настрой у яго бадзёры, напісаў, што трымаецца ... ».

У сваю чаргу, два дні таму Тацяна Яўгенаўна атрымала чарговую афіцыйную паперу, дзе ў чарговы раз паведамілі, што ў спатканні з сынам ёй адмовілі, піша «Народная воля». «Нічога іншага я не чакала, - кажа Тацяна Севярынец. - Але надзеі ўбачыць сына я не губляю. Справа ў тым, што заўтра ў Вярхоўным судзе будзе разглядацца пазоў сустаршыняў аргкамітэта «Беларускай хрысціянскай дэмакратыі» да Міністэрства юстыцыі. Будзе аспрэчвацца адмова ў рэгістрацыі. У сувязі з гэтым я напісала некалькі хадайніцтваў з патрабаваннем аб тым, каб Павал, які з'яўляецца адным са сустаршыняў аргкамітэта па стварэнні БХД, змог прысутнічаць на гэтым пасяджэнні. Паперы я адправіла у следчы камітэт, кіраўніку следчай групы, старшыні КДБ Зайцаву».