Інфармацыйныя знакі ў Менску будуць па-беларуску
36- 17.01.2012, 12:25
Дырэктар інфармацыйна-турыстычнага цэнтра «Менск» наракае, што пасля заклікаў у Інтэрнэце абураныя людзі тэлефануюць і пішуць лісты бесперапынна.
Ужо ў гэтым годзе ў Менску ўсталююць інфармацыйныя шчыты і знакі-стрэлкі, якія дапамогуць замежнікам лепш арыентавацца ў горадзе. Для гэтага вызначаныя 44 турыстычныя месцы. Гэта паркі імя Максіма Горкага і Чалюскінцаў, раён опернага тэатра, Няміга і іншыя аб'екты, піша «Наша Ніва».
Але на якой мове будуць усталяваныя інфармацыйныя знакі? Са спасылкай на агенцтва «Менск-Навіны» «Наша Ніва» распаўсюдзіла інфармацыю, што працоўнымі мовамі абраныя расейская і ангельская. Паколькі канчатковае рашэнне не было прынятае, газета заклікала пісаць лісты ў інфармацыйна-турыстычны цэнтр «Менск».
Як сталася, беларуская мова на знаках усё ж з'явіцца.
«Інфармацыя, што была выкладзеная ў Інтэрнэце, некарэктная. З пачатку праекта было вырашана, што інфармацыйныя знакі будуць зробленыя па-беларуску і па-ангельску. Прычым галоўны мова - беларуская. Гэта адназначна», - кажа дырэктар інфармацыйна-турыстычнага цэнтра «Менск» Алена Пліс.
«Нам прыйшло каля 40 лістоў у Інтэрнэце, адзін за адным прыходзяць заказныя лісты і тэлефанаванні, - працягвае яна. - Беларуская мова будзе абавязкова! Калі з'явіцца неабходнасць у тым, каб размясціць інфармацыю і па-расейску, то гэта будзе трэцяя мова».