Напампоўваць грашовую масу праз дзяржбанкі больш не будуць?

(абноўлена) Дзяржбанкі нібыта перасталі фінансаваць дзяржпраграмы.

Пра гэта заявіла член «савета рэспублікі» Ганна Шарэйка. Яна сказала, што беларускія дзяржбанкі спынілі выдачу крэдытаў на фінансаванне дзяржпраграм і павысілі маржу да стаўкі рэфінансавання (30%) да 12-15 адс.пунктаў, паведамляе «Інтэрфакс».

З гэтым пытаннем Ганна Шарэйка звярнулася да міністра фінансаў Беларусі Андрэя Харкаўца падчас абмеркавання ў «савеце рэспублікі» праекту закона аб бюджэце рэспублікі на наступны год.

«Банкі перасталі выдаваць крэдыты і павысілі маржу да стаўкі рэфінансавання да 12-15 адсоткавых пунктаў. У прыватнасці, такая сітуацыя склалася з крэдытамі ў беларускіх рублях па праграме развіцця птушкагадоўлі», - сказала Шарэйка.

Яна сцвярджае, што «гэта паўсюдна ў апошнія два дні - крэдыты не даюць ні «Белаграпрамбанк», ні «Беларусбанк», ні «Белінвестбанк».

Паводле яе слоў, «пад такія стаўкі не можа крэдытавацца ні адно, нават паспяховае прадпрыемства, або нам трэба спыніць развіццё?».

Міністр фінансаў Харкавец у сувязі з гэтым заявіў: «Ні рубля дадаткова на падтрымку ліквіднасці банкаў урад не мае намеру ўносіць». Пры гэтым Харкавец прызнаў, што «бягучыя адсоткавыя стаўкі - гэта не рэсурс для інвестыцыйнай дзейнасці».

У той жа час міністр перакананы, што, у выпадку прадастаўлення дзяржбанкам звышпланавай бюджэтнай падтрымкі, «наступствы будуць шматкротна цяжэй, чым некрэдытаванне аднаго-двух ці нават дзесятка прадпрыемстваў у пэўны перыяд часу».

Міністр нагадаў пра абавязальніцтвы Беларусі перад Антыкрызісным фондам ЕўрАзЭС, у адпаведнасці з якімі аб'ём эмісійнага крэдытавання дзяржбанкаў у гэтым годзе не павінен перавысіць Br7 трлн.

«За 9 месяцаў мы цалкам выконваем свае абавязацельствы, у адпаведнасці з графікам, размешчана Br6,7 трлн», - сказаў ён.

Нагадаем, прадстаўнікі МВФ і іншыя крэдыторы беларускіх улад патрабавалі адмовіцца ад бескантрольнага напампоўвання эканомікі пустымі грашыма праз дзяржбанкі шляхам фінансавання дзяржпраграм. Таму ў чэрвені 2011 года па рашэнні Аляксандра Лукашэнкі нібыта «з мэтай цэнтралізацыі і павышэння празрыстасці фінансавання дзяржпраграм» было створана ААТ «Банк развіцця Рэспублікі Беларусь». На пасаду кіраўніка ААТ рашэннем кіраўніка быў прызначаны экс-намеснік прэм'ер-міністра ўрада Сяргей Румас.