Місія МВФ прыступіла да працы ў Менску

Місія Міжнароднага валютнага фонду (МВФ) па постпраграмнаму маніторынгу прыступіла да працы ў Менску 18 кастрычніка.

Кіруе групай экспертаў кіраўнік місіі МВФ у Беларусі Дэвід Хофман, піша БелаПАН.

Мэта місіі, якая будзе працаваць па 29 кастрычніка, - правядзенне трэцяга па рахунку постпраграмнага маніторынгу эканомікі Беларусі. Справаздача місіі пасля заканчэння яе работы будзе абмеркавана радай дырэктараў МВФ.

Акрамя таго, адзначылі ў прадстаўніцтве МВФ, «візіт місіі прадаставіць магчымасць беларускім уладам і супрацоўнікам фонду абмеркаваць эканамічную палітыку ўлад і перспектывы развіцця нацыянальнай эканомікі ў 2013 годзе».

У 2009-2010 гадах Беларусь атрымала ад МВФ у рамках праграмы stand-by пяць траншаў крэдыту на 3,46 млрд. даляраў. Асноўны пік выплат прыпадзе на 2013-2014 гады, калі Беларусі трэба будзе вярнуць вялікую частку пазыкі.

За апошні час Менск некалькі разоў беспаспяхова звяртаўся ў МВФ за дапамогай. Аднак у фондзе паказалі на негатоўнасць улад Беларусі да глыбокіх структурных рэформ, што неабходна для аднаўлення крэдытнага супрацоўніцтва.

2 кастрычніка міністр фінансаў Андрэй Харкавец зноў паведаміў, што Беларусь гатова рэалізаваць новую праграму з МВФ. «У бліжэйшы час адбудзецца гадавы сход фонду. Дэлегацыя Беларусі правядзе там кансультацыі з прадстаўнікамі МВФ, - сказаў Харкавец. - Мы заяўлялі і будзем заяўляць, што Беларусь гатова рэалізаваць новую праграму з МВФ. Пытанне сёння будзе на баку нашых партнёраў».

Міністр не ўдакладніў, пра якія сумы у рамках новай праграмы можа ісці гаворка. «Для нас вызначальнай з'яўляецца не канкрэтная сума, а адказная макраэканамічная палітыка дзяржавы. Сума вызначыцца як складзецца разрыў у фінансаванні беларускай эканомікі на бліжэйшыя тры-пяць гадоў», - сказаў кіраўнік Мінфіна.

9-13 кастрычніка беларуская дэлегацыя на чале з міністрам эканомікі Мікалаем Снапковым удзельнічала ў Токіо ў мерапрыемствах штогадовага пасяджэння саветаў кіраўнікоў Сусветнага банка і Міжнароднага валютнага фонду. Вынікі працы кастрычніцкай місіі МВФ у Беларусі стануць асновай для далейшых кансультацый па аказанні тэхнічнай дапамогі краіне, паведамілі ў Мінэканомікі.