Біскуп патрабуе расследаваць катаванні ў дачыненні да Дашкевіча

Біскуп Аб'яднанай царквы хрысціян веры евангельскай Сяргей Цвор просіць дзяржаўныя органы правесці расследаванне дзеянняў адміністрацыі ПК № 20 Мазыра.

Адпаведны зварот святар накіраваў у Камітэт па справах рэлігій і нацыянальнасцяў, Генеральную пракуратуру і дэпартамент выканання пакаранняў МУС, паведамляе прэс-служба аргкамітэта па стварэнні партыі «Беларуская хрысціянская дэмакратыя» (БХД).

Біскуп паведамляе, што 26 верасня ў СМІ з'явілася інфармацыя аб ціску, які аказваецца на Дашкевіча з боку адміністрацыі калоніі. Паведамлялася, у прыватнасці, што прадстаўнікі адміністрацыі абразліва выказваліся з нагоды пратэстанцкіх цэркваў і евангельскай веры Дашкевіча, а таксама з іх вуснаў гучалі пагрозы згвалтавання.

«Зміцер Дашкевіч з'яўляецца сябрам царквы хрысціян веры евангельскай «Іаан Прадцеча» Менска з 2006 года. Яго арышт і асуджэнне за нібыта здзейсненае ім нападзенне на двух мужчын выклікала нямала пытанняў як непраўдападобнасцю такіх дзеянняў з боку хрысціяніна, так і дзіўным правядзеннем працэсу, калі пацярпелых ніхто не бачыў. Інфармацыя пра ціск, што аказваецца ў калоніі на Дашкевіча, выклікае нашу трывогу і заклапочанасць. Асабліва дзіўна, што начальнік калоніі Юрый Збароўскі, які называе сябе праваслаўным і па статусе закліканы адказваць за законнасць і правапарадак, дазваляе сабе абразлівае стаўленне да евангельскіх вернікаў», - напісаў Цвор.

Ён адзначыў, што дзякуючы дзейнасці евангельскіх хрысціян «многія асуджаныя пакідаюць сваё ранейшае злачыннае жыццё і становяцца нармальнымі членамі грамадства». «Але перш за ўсё, пагрозы і абразы недапушчальныя ў дачыненні да любога чалавека, верніка або няверніка, бо кожны чалавек ёсць вобраз Божы і ўсякая абраза і прыніжэнне чалавека ў нейкай меры абражае і Творцу. Нядзіўна, што абразы і пагрозы, у тым ліку і пагрозы згвалтавання, якія гучаць з вуснаў прадстаўнікоў адміністрацыі калоніі, падштурхнулі Дашкевіча на такую крайнюю форму пратэсту, як галадоўка», - адзначае Цвор.

Біскуп просіць правесці ўсебаковае расследаванне фактаў неправавых дзеянняў адміністрацыі мазырскай папраўчай калоніі № 20 у дачыненні да Дашкевіча і прыняць меры па недапушчэнні падобных фактаў у будучыні. «А мы, у сваю чаргу, будзем маліцца ў памесных цэрквах, каб жыццё і здароўе Зміцера Дашкевіча былі па-за небяспекі», - заключае Цвор.