Крымінальная справа супраць журналіста Петрушэнкі спынена

Журналіст Мікалай Петрушэнка атрымаў апавяшчэнне аб спыненні крымінальнага пераследу.

Следчы ўпраўлення СК па Віцебскай вобласці Сахарава С.В. паведаміла, што справа была спыненая 17 кастрычніка «у сувязі з адсутнасцю ў дзеяннях складу злачынства».

Нагадаем, што ў канцы жніўня Аршанскі гарадскі аддзел Следчага камітэта РБ узбудзіў крымінальную справу ў дачыненні да журналіста Мікалая Петрушэнкі за «абразу прадстаўніка ўлады».

Падставай стаў артыкул Петрушэнкі пад назвай «Педафіл атрымліваў прэміі за лепшыя дзіцячыя пляцоўкі», піша nash-dom.info.

Згодна з пастановай за подпісам старэйшага следчага С. Шчарбянка, аўтар артыкула «паказвае», што намеснік старшыні Аршанскага гарвыканкама падазраецца ў пакрыванні дзейнасці педафіла. Тым самым Петрушэнка нібыта «публічна абразіў» гарадскога чыноўніка «як прадстаўніка ўлады ў сувязі з выкананнем ім службовых абавязкаў».

У пачатку верасня стала вядома, што справу Петрушэнкі перадалі ва ўпраўленне следчага камітэта Віцебскай вобласці «з мэтай аб'ектыўнага і прафесійнага даследавання ўсіх акалічнасцей».

Лінгвістычная экспертыза «крымінальнага» тэксту была даручана Віцебскаму педагагічнаму ўніверсітэту, спецыялісты якога не знайшлі ў тэксце нічога крымінальнага.