Кірылічную даменную зону .Бел увядуць у 2013 годзе

Фізічныя і юрыдычныя асобы змогуць рэгістраваць даменныя імёны ў гэтай зоне.

Пра гэта паведаміў карэспандэнту БелТА дырэктар ТАА «Хостэр Бай» Сяргей Павалішаў, які прымае сёння ўдзел у канферэнцыі «Дзелавы Інтэрнэт».

Па словах Сяргея Павалішава, кірылічная зона .Бел павінна быць уведзена на працягу 2013 года.

Акрамя таго, чакаецца, што ў 2013 годзе колькасць даменаў у нацыянальным сегменце сеткі Інтэрнэт перавысіць 100 тыс. У цяперашні час у зоне .By распрададзеныя ўсе двухлітарныя дамены. Што тычыцца адналітарных даменаў, то рашэнне па іх далейшым выкарыстанні павінен будзе прымаць Аператыўна-аналітычны цэнтр пры прэзідэнце Беларусі. Міжнародны рэгістратар ужо звяртаўся да тэхнічнага адміністратара даменнай зоны. By з падобнай прапановай.

Сяргей Павалішаў таксама расказаў, што найбольш папулярныя даменныя імёны, выстаўленыя на дабрачынны аўкцыён, не знайшлі свайго пакупніка. Удзельнікі, якія выставілі максімальныя сумы па лотах Casino.By, Business.By і Divan.By, замест таго, каб пералічыць сродкі на дабрачынны рахунак, спрабавалі перапрадаць дамены па больш высокім кошце. Калі гэта ў іх не атрымалася, яны адмовіліся ад даменаў.

Непрададзеныя дамены плануецца зноў выставіць на дабрачынны аўкцыён. У прыватнасці, толькі за Casino.By і Business.By плануецца выручыць па $20 тыс.

25 кастрычніка завяршаецца другі тур дабрачыннага аўкцыёну. Выстаўленыя даменныя імёны выклікаюць меншую цікавасць у патэнцыйных пакупнікоў. На дадзены момант лідзіруе лот Internet.By, за які адзін з удзельнікаў аўкцыёну гатовы выкласці Br12 млн.

У гэтым годзе змяніўся тэхнічны адміністратар даменнай зоны. By. Ім стала УП «Надзейныя праграмы». Па ўсёй бачнасці, гэтая ж кампанія будзе адміністраваць і кірылічную даменную зону .Бел.