БТ адцэнзуравала абяцанне Лукашэнкі вызваліць Халіп (Відэа)

Тэлеканал «Беларусь-1» у чатыры разы скараціў скандальнае інтэрв'ю Лукашэнкі газеце The Independent.

Учора дзяржаўны канал «Беларусь-1» паказаў інтэрв'ю кіраўніка брытанскім журналістам. Нягледзячы на тое, што яно доўжылася 4 гадзіны, БТ паказала крыху больш за гадзіну і выразала абяцанні дыктатара вызваліць журналістку «Новой газеты» Ірыну Халіп.

Нагадаем, падчас інтэрв'ю Аляксандра Лукашэнкі The Independent прадстаўнік выдання Яўген Лебедзеў пацікавіўся лёсам Ірыны Халіп. У траўні мінулага года яна была прызнаная вінаватай ва ўдзеле ў «масавых беспарадках» пасля выбараў 19 снежня 2010 года і асуджаная на два гады пазбаўлення волі з адтэрміноўкай на два гады. Гэтыя два гады жонка былога кандыдата ў прэзідэнты Андрэя Саннікава не можа пакідаць Менск, абавязаная кожны тыдзень адзначацца ў мясцовым УУС і вяртацца дадому не пазней за 10 вечара (правяраць яе супрацоўнікі міліцыі прыходзяць як мінімум раз у тыдзень). Тэрмін адтэрміноўкі сканчаецца 20 ліпеня наступнага года, пасля чаго справу Халіп другі раз перададуць у суд, які павінен вырашыць, вызваліць яе, адправіць у турму ці пакінуць у тым жа статусе яшчэ на нейкі тэрмін.

Лебедзеў пацікавіўся ў Лукашэнкі, чаму Халіп не можа пакідаць краіну. «Я ведаю Ірыну асабіста, упэўнены, што яна не злачынца, і гатовы паручыцца за яе. Чаму яна не можа, напрыклад, паехаць у Маскву да ўрача?»- спытаў ён.

Адказ Аляксандра Лукашэнкі быў нечаканым:

- А што, яна тут? Я думаў, яна ў Маскве. Адпраўце сёння ж з вячэрнім канём. Забірайце і больш сюды не прывозьце. Я аб гэтым чалавеку наогул не магу казаць. Ніколі не вымаўляеце гэтае слова. Вы хочаце яе ў Маскву - вязіце.

- Яна пад падпіскай аб нявыездзе, - нагадаў Лебедзеў.

А, яна пад падпіскай... Андрэй, - звярнуўся кіраўнік да аднаго з падначаленых. - Удакладніце, хто наогул гэтым займаецца - з міліцыі ці хто там, і мне скажыце. <...> Бачыце, дыктатура таксама добрая. Ні адзін прэзідэнт б адразу не прыняў рашэнне, а я вось прыняў. <...> Халіп вы сёння везяце замест жонкі дадому.

Аднак літаральна праз пару гадзін пасля таго, як гэтая інфармацыя з'явілася ў беларускіх СМІ, з сайта брытанскай газеты Evening Standard знікла публікацыя з вытрымкамі з інтэрв'ю Аляксандра Лукашэнкі, дзе ён выказваўся пра журналістку, а ў прэс-службе кіраўніка заявілі, што ніякага інтэрв'ю пра Халіп беларускі дыктатар не даваў.

Праз тыдзень на брытанскай тэлерадыёкампаніі ВВС выйшаў сюжэт, у якім пацвярджаліся словы Лукашэнкі і было паказана відэа, дзе ён абяцае вызваліць Ірыну Халіп.